ໃນວັນທີ 29 ເມສາ 2026 ນີ້ຢູ່ສະໂມສອນກອງບັນຊາການທະຫານແຂວງບໍ່ແກ້ວ ໄດ້ຈັດພິທີ ປາຖະກະຖາວັນປົດ ປ່ອຍພາກໃຕ້ຫວຽດນາມ ຄົບຮອບ 51 ປີ (30 ເມສາ 1975 – 30 ເມສາ 2026), ວັນສ້າງຕັ້ງສາຍພົວພັນການທູດລາວ-ຈີນ ຄົບຮອບ 65 ປີ (25 ເມສາ 1961-25 ເມສາ 2026), ວັນກຳມະກອນສາກົນ ຄົບຮອບ 140 ປີ (1/5/1886 – 1/5/2026) ໂດຍການເປັນປະທານ ແລະ ປາຖະຖະຖາ ຂອງ ສະຫາຍ ພັນເອກ ອຳພັນ ໄຊຍາສຸບັດ ຮອງເລຂາຄະນະພັກ ຫົວໜ້າການເມືອງ ກອງບັນຊາການທະຫານແຂວງບໍ່ແກ້ວ, ມີຄະນະພັກ-ຄະນະບັນຊາ 5 ຫ້ອງ, ພະແນກການ, ຕະຫຼອດຮອດພະນັກງານ-ນັກຮົບ ທົ່ວກົມກອງ ອ້ອມຂ້າງ ກອງບັນຊາການ ເຂົ້າຮ່ວມຮັບຟັງ.
ໃນພິທີສະຫາຍ ໄດ້ຍົກໃຫ້ເຫັນມູນເຊື້ອການຕໍ່ສູ້ຢ່າງພິລະອາດຫານ ດ້ວຍນໍ້າໃຈຮັກຊາດອັນແຮງກ້າ, ຄຽດແຄ້ນຈັກກະພັດຢ່າງເລິກເຊິ່ງ ຂອງປະຊາຊົນຫວຽດນາມ ຜູ້ພິລະອາດຫານ ພາຍໃຕ້ການນຳພາຂອງພັກຄອມມູນິດຫວຽດນາມ ໄດ້ລຸກຂື້ນຕໍ່ສູ້ກູ້ຊາດຕ້ານຈັກກະພັດອາເມລິກາ ແລະ ລູກມື ເພື່ອກອບກູ້ເອົາເອກະລາດ ແລະ ອິດສະຫລະພາບມາໃຫ້ປະເທດຊາດຂອງຕົນຕາມຄໍາສັ່ງສອນຂອງພັກ ແລະ ປະທານ ໂຮ່ຈີມິນ ທີ່ວ່າ: ບໍ່ມີຫຍັງປະເສີດເລີດລ້ຳກວ່າເອກະລາດ ແລະ ເສລີພາບ. ຕໍ່ໜ້າສະພາບການດັ່ງກ່າວ ພັກຄອມມູນິດຫວຽດນາມ ຈຶ່ງໄດ້ເປີດບັ້ນຮົບປົດປ່ອຍພາກໃຕ້ຫວຽດນາມ ເຊິ່ງໃຊ້ຊື່ວ່າ: ບັ້ນຮົບໂຮ່ຈີມິນ ແລະ ເປັນວັນເວລາປະຫວັດສາດ ແຫ່ງການຕໍ່ສູ້ກູ້ຊາດຕ້ານຈັກກະພັດອາເມລິກາ ຂອງກອງທັບ ແລະ ປະຊາຊົນຫວຽດນາມ ແລະ ການລຸກຮືຂື້ນໃນລະດູບານໃໝ່ ປີ 1975 ໄດ້ຮັບໄຊຊະນະຢ່າງສົມບູນ, ພາກໃຕ້ຫວຽດນາມ ໄດ້ຮັບການປົດປ່ອຍ, ທົ່ວປະເທດຫວຽດນາມ ໄດ້ຮັບການປົດປ່ອຍຢ່າງສົມບູນ ແລະ ໄດ້ສ້າງສັງກາດໃໝ່ ຄື: ເອກະລາດ, ອິດສະຫລະພາບ, ເອກະພາບ ແລະ ກ້າວຂື້ນສັງຄົມນິຍົມ. ພ້ອມທັງໄດ້ໃຫ້ຮູ້ເຖິງຄວາມເປັນມາ ແລະ ມູນເຊື້ອແຫ່ງການສ້າງຕັ້ງສາຍພົວພັນການທູດລະຫວ່າງ ສປປ ລາວ- ສປ ຈີນ. ກ່ອນ ປີ 1975 ການພົວພັນ ແລະ ຮ່ວມມື ລາວ-ຈີນ ແມ່ນຢູ່ໃນຮູບການສະໜັບສະໜູນຊ່ວຍເຫລືອໃຫ້ແກ່ພາລະກິດຕໍ່ສູ້ຂອງປະຊາຊົນລາວບັນດາເຜົ່າ ເພື່ອຂັບໄລ່ຈັກກະພັດຕ່າງດ້າວ ແລະ ໂຄ່ນລົ້ມຊົນຊັ້ນປົກຄອງທີ່ກົດຂີ່ຂູດຮີດ. ຕົກມາໃນວັນທີ 25/04/1961 ລັດຖະບານປະສົມແຫ່ງຊາດ ນໍາໂດຍສະເດັດເຈົ້າ ສຸວັນນະພູມມາ ນາຍົກລັດຖະມົນຕີວ່າການກະຊວງການຕ່າງປະເທດໄດ້ເຊັນເອກະສານສໍາຄັນວ່າດ້ວຍການສ້າງຕັ້ງສາຍພົວພັນການທູດ ລາວ-ຈີນ, ນັ້ນແມ່ນເຫດການທີ່ສໍາຄັນຍິ່ງໃນປະຫວັດສາດຂອງການພົວພັນ ລາວ-ຈີນ, ເຮັດໃຫ້ການພົວພັນ ລະຫວ່າງ ສອງປະເທດ ໄດ້ກ້າວເຂົ້າສູ່ໄລຍະພັດທະນາອັນໃໝ່ ແລະ ກວ້າງຂວາງກວ່າເກົ່າ. ທັງນີ້, ກໍເພື່ອສືບຕໍ່ເສີມຂະຫຍາຍສາຍພົວພັດມິດຕະ ພາບ ທີ່ມີມູນເຊື້ອອັນດີງາມ ແລະ ບົນພື້ນຖານແຫ່ງການພົວພັນອັນໜັກແໜ້ນຕາມຈິດໃຈໝັ້ນຄົງ,ຍາວນານ, ຮັກແພງກັນຖານບ້ານໃກ້ເຮືອນຄຽງ, ໄວ້ເນື້ອເຊື່ອໃຈກັນ. ພ້ອມທັງໄດ້ຮູ້ເຖິງຄວາມສຳຄັນຂອງວັນກຳມະກອນສາກົນ ທີ່ໄດ້ຖືກກຳເນີດຂຶ້ນໃນປີ 1886 ຈາກການຕໍ່ສູ້ຮຽກຮ້ອງສິດທິ ແລະ ຜົນປະໂຫຍດຂອງຜູ້ອອກແຮງງານ ເປັນຕົ້ນແມ່ນຮຽກຮ້ອງ ລຸດຜ່ອນຊົ່ວໂມງເຮັດວຽກ ແລະ ໃຫ້ຄ່າຕອບແທນຢ່າງເໝາະສົມ ເພື່ອຮັບຮູ້ ແລະ ເສີມຂະຫຍາຍ ມູນເຊື້ອວັນກໍາມະກອນ ສາກົນຄົບຮອບ 140 ປີ ເຂົ້າໃນການພັດທະນາ ພາລະກິດຂອງຊາວຜູ້ອອກແຮງງານ ໃນການຮ່ວມກັນຂັບເຄື່ອນ ການພັດທະນາເສດຖະກິດ-ສັງ ຄົມ ຂອງປະເທດຊາດ ໃຫ້ຮັ່ງມີເຂັ້ມແຂງ ຂື້ນເລື້ອຍໆ.
#ໂດຍ: ພາກ ສຸທິປັນຍາ
