ຄະນະຮັບຜິດຊອບວຽກງານກໍ່ສ້າງຮາກຖານການເມືອງ,ຕິດພັນກັບວຽກງານພັດທະນາຊົນນະບົດ ແກ້ໄຂຄວາມທຸກຍາກ ແລະ ວຽກງານ 3 ສ້າງຂອງແຂວງບໍ່ແກ້ວ, ແມ່ນໄດ້ເອົາໃຈໃສ່ກໍານົດທິດທາງແຜນການຈຸດສຸມ ສໍາລັບປີ 2026 ໂດຍເນັ້ນໃສ່ການຫັນພະນັກງານລົງກໍ່ສ້າງຮາກຖານຢ່າງທົ່ວເຖິງ ເພື່ອປັບປຸງລະບົບການເມືອງຢູ່ຂັ້ນຮາກຖານໃຫ້ມີຄວາມໜັກແໜ້ນແລະຊຸກຍູ້ການພັດທະນາເສດຖະກິດ-ສັງຄົມແນໃສ່ຍົກລະດັບຊີວິດການເປັນຢູ່ຂອງປະຊາຊົນບັນດາເຜົ່າໃຫ້ດີຂຶ້ນເລື້ອຍໆ.
ສໍາລັບແຜນການ ແລະ ມາດຕະການຈຸດສຸມທີ່ຈະສືບຕໍ່ຈັດຕັ້ງປະຕິບັດນິ້ ປະກອບມີ 4 ດ້ານຕົ້ນຕໍ, ວຽກງານກໍ່ສ້າງຮາກຖານການເມືອງ ແລະ ຄວາມສົມບູນແບບຂອງລະບົບການຈັດຕັ້ງຫັນພະນັກງານລົງຮາກຖານ: ສືບຕໍ່ຈັດສົ່ງພະນັກງານຫຼັກແຫຼ່ງ, ພະນັກງານວິຊາການຈາກຂັ້ນແຂວງ ແລະ ຂັ້ນເມືອງ ລົງໄປປະຈໍາການຢູ່ບ້ານຈຸດສຸມ ຢ່າງມີກໍານົດເວລາ ເພື່ອຮ່ວມຊີວິດ, ຮ່ວມເຮັດ ເວນຍາມ ແລະ ນໍາພາປະຊາຊົນຢ່າງໃກ້ຊິດ, ປັບປຸງກົນໄກການປົກຄອງບ້ານ:ສຸມໃສ່ການປັບປຸງຮາກຖານພັກ, ອົງການປົກຄອງບ້ານ ແລະ ອົງການຈັດຕັ້ງມະຫາຊົນ (ຊາວໜຸ່ມ, ແມ່ຍິງ, ແນວໂຮມ, ນັກຮົບເກົ່າ ) ໃຫ້ມີຄວາມເຂັ້ມແຂງ, ສາມາດເປັນຄັນທຸງໃນການນໍາພາປະຊາຊົນຈັດຕັ້ງປະຕິບັດແນວທາງຂອງພັກ ແລະ ກົດໝາຍຂອງລັດ, ວຽກງານປ້ອງກັນຊາດ-ປ້ອງກັນຄວາມສະຫງົບ ( ປກຊ-ປກສ ) ເພີ່ມທະວີການສ້າງບ້ານປ້ອມໝັ້ນສູ້ຮົບຕິດລຽນ,ສ້າງບ້ານປ້ອງກັນຊາດເຂັ້ມແຂວງ,ສ້າງບ້ານປ້ອງກັນຄວາມສະຫງົບດີ,ສະກັດກັ້ນແລະ ແກ້ໄຂປະກົດການຫຍໍ້ທໍ້ຕ່າງໆ ເປັນຕົ້ນແມ່ນ ບັນຫາຍາເສບຕິດ, ອຸປະຕິເຫດຕາມທ້ອງຖະໜົນ ແລະ ການລັກລອບເຂົ້າເມືອງຜິດກົດໝາຍ ຕາມບໍລິເວນຊາຍແດນ.
ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຍູ້ແຮງການຜະລິດເປັນສິນຄ້າ: ສົ່ງເສີມໃຫ້ປະຊາຊົນຫັນມາເຮັດການຜະລິດກະສິກໍາສະອາດ, ກະສິກໍາອິນຊີ ທີ່ເປັນທ່າແຮງຂອງທ້ອງຖິ່ນ ເພື່ອສະໜອງໃຫ້ແກ່ຕະຫຼາດພາຍໃນ ແລະ ເຂດເສດຖະກິດພິເສດ, ພ້ອມທັງຊຸກຍູ້ການນໍາໃຊ້ປຸຍອິນຊີພາຍໃນປະເທດ ເພື່ອຫຼຸດຜ່ອນຕົ້ນທຶນການຜະລິດ, ພັດທະນາໂຄງລ່າງພື້ນຖານຂະໜາດນ້ອຍ: ສືບຕໍ່ກໍ່ສ້າງ ແລະ ສ້ອມແປງເສັ້ນທາງທ່ຽວໄດ້ສອງລະດູເຂົ້າຫາບ້ານ, ລະບົບນ້ຳລິນ,ໄຟຟ້າຊຸມຊົນ,ໂຮງຮຽນ ແລະ ສຸກສາລາ ໂດຍສະເພາະແມ່ນການຕິດຕາມບັນດາໂຄງການພັດທະນາສູນພັດທະນາສີມືແຮງງານ ແລະ ໂຄງການປ້ອງກັນຕາຝັ່ງເຈື່ອນ ໃຫ້ສໍາເລັດຕາມແຜນການ, ການສ້າງຄອບຄົວ ແລະ ບ້ານພັດທະນາ: ປະເມີນ ແລະ ປະກາດບ້ານພັດທະນາ, ບ້ານວັດທະນະທຳ ໃຫ້ເພີ່ມຂຶ້ນ ໂດຍອີງຕາມມາດຕະຖານພັດທະນາໃໝ່, ເນັ້ນໃສ່ການສ້າງຄວາມເຂັ້ມແຂງດ້ານເສດຖະກິດຄອບຄົວ ເພື່ອບໍ່ໃຫ້ກັບຄືນມາທຸກຍາກອີກ.
ວຽກງານ 3 ສ້າງ (ຫັນທິດສູ່ຄວາມເຂັ້ມແຂງຂອງທ້ອງຖິ່ນ )ສ້າງແຂວງເປັນໜ່ວຍຍຸດທະສາດ: ເພີ່ມທະວີຄວາມສາມາດໃນການຄຸ້ມຄອງມະຫາພາກ,ສ້າງສະພາບແວດລ້ອມທີ່ເອື້ອອໍານວຍໃຫ້ແກ່ການລົງທຶນແລການທ່ອງທ່ຽວ, ຄຸ້ມຄອງລາຍຮັບ-ລາຍຈ່າຍງົບປະມານໃຫ້ເຂັ້ມງວດ ເພື່ອແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ: ມອບໂອນສິດອໍານາດ ແລະ ຄວາມຮັບຜິດຊອບ ໃຫ້ຂັ້ນເມືອງ (ເຊັ່ນ: ເມືອງຫ້ວຍຊາຍ, ເມືອງຕົ້ນເຜິ້ງ ແລະ ເມືອງອື່ນໆ) ໃນການຄຸ້ມຄອງເສດຖະກິດ-ສັງຄົມ, ການເກັບລາຍຮັບ ແລະ ການອະນຸມັດໂຄງການລົງທຶນຂະໜາດນ້ອຍ ໃຫ້ມີຄວາມຄ່ອງຕົວ, ສ້າງບ້ານເປັນຫົວໜ່ວຍພັດທະນາ: ເນັ້ນໃສ່ການສ້າງ “ບ້ານ 3 ສ້າງ” ຕົວແບບ, ໂດຍສະເພາະແມ່ນການປະກາດສ້າງຕັ້ງກົນໄກການປົກຄອງໃໝ່ໃນເຂດທີ່ມີການຂະຫຍາຍຕົວຂອງພົນລະເມືອງ ( ເຊັ່ນ: ການຕິດຕາມ ແລະ ຈັດຕັ້ງກົນໄກບໍລິຫານເຂດຈຸດສຸມ ຫຼື ຕາແສງໃໝ່ ໃຫ້ເປັນລະບົບ ) ເພື່ອເຮັດໃຫ້ການບໍລິຫານລັດເຂົ້າເຖິງປະຊາຊົນຢ່າງມີປະສິດທິພາບ.
ມາດຕະການຈັດຕັ້ງປະຕິບັດ ແລະ ການແກ້ໄຂຄວາມຫຍຸ້ງຍາກ:ວຽກງານກໍ່ສ້າງຮາກຖານການເມືອງ ແລະ 3 ສ້າງ ຍິ່ງຕ້ອງໄດ້ເຮັດຢ່າງຈິງຈັງ, ຕ້ອງປຸກລະດົມໃຫ້ປະຊາຊົນເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ,ນຳໃຊ້ຜະລິດຕະພັນພາຍໃນ ບວກກັບການຊ່ວຍເຫຼືອ ແລະ ຊຸກຍູ້ຈາກພາກລັດຢ່າງຖືກເປົ້າໝາຍ.”ການສືບຕໍ່ວຽກງານກໍ່ສ້າງຮາກຖານການເມືອງ, ພັດທະນາຊົນນະບົດ ແລະ ວຽກງານ 3 ສ້າງ ຢູ່ແຂວງບໍ່ແກ້ວ ໃນປີ 2026 ນີ້ ແມ່ນບາດກ້າວອັນສໍາຄັນທີ່ຈະຊ່ວຍຮັດແໜ້ນຄວາມສາມັກຄີຮັກແພງລະຫວ່າງພັກ-ລັດກັບປະຊາຊົນ,ທັງເປັນການສ້າງປະຖົມປັດໄຈອັນໜັກແໜ້ນໃຫ້ແກ່ການສະເຫຼີມສະຫຼອງວັນສໍາຄັນຕ່າງໆຂອງພັກ,ຂອງຊາດແລະກ້າວໄປສູ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃຫ້ບັນລຸຄາດໝາຍທີ່ວາງໄວ້ຢ່າງສົມບູນ.
ໂດຍ: ເງິນຫຼົົງ ຈິດພູວົງ.
ແອດມິນ: ທອງຈັນ ວົງປັນຍາ.
