ຂະແໜງທ່ອງທ່ຽວທີ່ຂຶ້ນກັບ ພະແນກວັດທະນະທຳ ແລະ ທ່ອງທ່ຽວແຂວງບໍ່ແກ້ວ,ໄດ້ສະຫຼຸບລາຍງານຕົວເລກສະຖິຕິນັກທ່ອງທ່ຽວທີ່ເດີນທາງເຂົ້າ-ອອກ ໂດຍຜ່ານດ່ານສາກົນ ແລະ ດ່ານຈຸດຕ່າງໆ ພາຍໃນແຂວງບໍ່ແກ້ວ ປະຈໍາ 4 ເດືອນຕົ້ນປີ (ມັງກອນ – ເມສາ) 2026 ນິ້.ເຫັນໄດ້ວ່າມີ ນັກທ່ອງທ່ຽວ ທັງພາຍໃນ ແລະ ຕ່າງປະເທດ ແມ່ນມີທ່າອ່ຽງເພີ່ມຂຶ້ນຢ່າງຕັ້ງໜ້າ ເຊິ່ງສາມາດສ້າງລາຍຮັບທາງກົງ ແລະ ທາງອ້ອມ ເຂົ້າສູ່ລະບົບເສດຖະກິດຂອງແຂວງໄດ້ຢ່າງຫຼວງຫຼາຍ.ໃນໄລຍະ 4 ເດືອນຜ່ານມາມີຈໍານວນນັກທ່ອງທ່ຽວເດີນທາງເຂົ້າແຂວງບໍ່ແກ້ວ ມີທັງໝົດ 85,862 ເທື່ອຄົນ. ທຽບໃສ່ໄລຍະດຽວກັນຂອງປີຜ່ານມາ ແມ່ນເພີ່ມຂຶ້ນ 3,670 ເທື່ອຄົນ (ເທົ່າກັບ 4.46%).ທຽບໃສ່ແຜນການຄາດຄະເນໝົດປີ ປະຕິບັດໄດ້ແລ້ວ 40.89% ຂອງແຜນການ.ໃນນິ້ດ່ານສາກົນຂົວມິດຕະພາບ 4 (ຫ້ວຍຊາຍ-ຊຽງຂອງ)ມີນັກທ່ອງທ່ຽວເຂົ້າຜ່ານດ່ານຫຼາຍທີ່ສຸດເຖິງ 54,290 ເທື່ອຄົນ. ດ່ານເຂດເສດຖະກິດພິເສດສາມຫຼ່ຽມຄຳ ມີຈໍານວນ 18,367 ເທື່ອຄົນ.ນັກທ່ອງທ່ຽວເຂົ້າແຂວງ (ຜ່ານຊ່ອງທາງອື່ນໆ): ມີຈໍານວນ 3,778 ເທື່ອຄົນ.ນັກທ່ອງທ່ຽວພາຍໃນ (ທ່ຽວທ້ອງຖິ່ນ)ມີຈໍານວນ 9,427 ເທື່ອຄົນ.ນັກທ່ອງທ່ຽວສາກົນເດີນທາງອອກຈາກແຂວງບໍ່ແກ້ວ ມີຈໍານວນ 34,231 ເທື່ອຄົນ.ນັກທ່ອງທ່ຽວຊາຍແດນມີຈໍານວນ 16,275 ເທື່ອຄົນ. ຜ່ານການເຄື່ອນໄຫວທ່ຽວຊົມ, ພັກເຊົາ ແລະ ຊົມໃຊ້ບໍລິການຕ່າງໆ ພາຍໃນແຂວງບໍ່ແກ້ວ ຂອງນັກທ່ອງທ່ຽວທັງພາຍໃນ ແລະ ຕ່າງປະເທດ ໃນໄລຍະ 4 ເດືອນຜ່ານມາ,ສາມາດສ້າງລາຍຮັບສໍາຜັດ (ລາຍຮັບທາງກົງຈາກການທ່ອງທ່ຽວ) ໄດ້ທັງໝົດເປັນມູນຄ່າສູງເຖິງ 4,293,100 ໂດລາສະຫະລັດ (ສີ່ລ້ານສອງແສນເກົ້າສິບສາມພັນໜຶ່ງຮ້ອຍ ໂດລາສະຫະລັດ).ຈາກຕົວເລກດັ່ງກ່າວ ສະແດງໃຫ້ເຫັນວ່າ ດ່ານສາກົນຂົວມິດຕະພາບ 4 ຍັງຄົງເປັນປະຕູດ່ານຫຼັກ ທີ່ມີຄວາມສໍາຄັນທີ່ສຸດໃນການຕ້ອນຮັບນັກທ່ອງທ່ຽວ.ຂະນະທີ່ ເຂດເສດຖະກິດພິເສດສາມຫຼ່ຽມຄໍາ ກໍເປັນອີກໜຶ່ງຈຸດໝາຍປາຍທາງ ທີ່ສາມາດດຶງດູດການທ່ອງທ່ຽວ ແລະ ສ້າງລາຍຮັບໃຫ້ແກ່ທ້ອງຖິ່ນໄດ້ຢ່າງຕໍ່ເນື່ອງ. ຄາດວ່າໃນທ້າຍປີ ຕົວເລກຈະບັນລຸຕາມແຜນການທີ່ວາງໄວ້ ຍ້ອນການປັບປຸງພື້ນຖານໂຄງລ່າງ ແລະ ສິ່ງອໍານວຍຄວາມສະດວກຕ່າງໆ ພາຍໃນແຂວງທີ່ມີຄວາມຄືບໜ້າເປັນຢ່າງດີ.
ໂດຍ: ເງິນຫຼົງ ຈິດພູວົງ.
ແອດມິນ: ທອງຈັນ ວົງປັນຍາ.
