ໃນວັນທີ 4 ມີຖຸນາ 2026 ຜ່ານມານີ້, ຢູ່ທີ່ສະໂມສອນ ເມືອງເມິງ ແຂວງບໍ່ແກ້ວ ໄດ້ຈັດກອງປະຊຸມເຜີຍແຜ່ ວຽກງານສີມືແຮງງານ, ວຽກງານໂຄສະນາຂໍ້ມູນຂ່າວສານ ວຽກງານຈັດຫາງານ ແລະ ວຽກງານນະໂຍບາຍຕໍ່ຜູ້ມີຜົນງານ ພິການ ແລະ ອາຍຸສູງ ໂດຍການເປັນປະທານຮ່ວມ ຂອງທ່ານ ວັນນະສອນ ໂພທິປັນຍາ ກໍາມະການພັກແຂວງ, ຫົວໜ້າພະແນກແຮງງານ ແລະ ສະຫວັດດີການແຂວງບໍ່ແກ້ວ, ມີທ່ານ ວັນນາ ຄໍາສີປະເສີດ ຮອງເລຂາພັກເມືອງ, ປະທານຄະນະກໍາມະການປົກຄອງເມືອງ, ມີບັນດາທ່ານ ຫົວໜ້າ-ຮອງຫົວໜ້າຫ້ອງການ, ສອງກອງບັນຊາການ ປກຊ-ປກສ, ຕະຫຼອດພະນັກງານ-ລັດຖະກອນ ທີເຮັດວຽກກ່ຽວການເງິນແຕ່ລະຫ້ອງການອ້ອມຂ້າງເມືອງເຂົ້າຮ່ວມ.
ໃນພິທີ ຄະນະຮັບຜິດຊອບ ໄດ້ຂຶ້ນເຜີຍແຜ່ບັນດາເອກະສານຕ່າງໆທີ່ສໍາຄັນຄື: ວຽກງານແຮງງານ ການຊ່ວຍເຫຼືອ ແລະ ປົກປ້ອງຄຸ້ມຄອງແຮງງານລາວຢູ່ພາຍໃນແຂວງບໍ່ແກ້ວ; ການຈັດຕັ້ງປະຕິບັດວຽກງານພັດທະນາສີມືແຮງງານ ສົ່ງເສີມການຝຶກສີມືແຮງງານໃຫ້ກຸ່ມເປົ້າໝາຍຜູ້ເຂົ້າຝຶກສີມືແຮງງານ ສໍາລັບໂຄງການສົ່ງເສີມທັກສະທີ່ເປັນບູລິມະສິດສໍາລັບການເຕີບໂຕຂອງ ສປປລາວ; ດໍາລັດວ່າດ້ວຍການປະຕິບັດນະໂຍບາຍຕໍ່ຜູ້ທີ່ມີຜົນງານ ແລະ ຄຸນງາມຄວາມດີ ໃນພາລະກິດການປະຕິວັດຊາດ ປະຊາທິປະໄຕ ສະບັບເລກທີ 57/ລບ, ລົງວັນທີ 27 / 1 / 2025; ກົດໝາຍວ່າດ້ວຍຄົນພິການ ສະບັບເລກທີ 57/ສພຊ, ລົງວັນທີ 10 ທັນວາ 2018; ແລະ ວຽກງານອື່ນໆຕື່ມອີ່ກ ທັງນີ້ກໍ່ເພຶ່ອເຮັດໃຫ້ ພະນັກງານງານຫຼັກແຫຼງຂອງເມືອງ ກໍ່ຄືພະນັກງານທີ່ເຮັດວຽກກ່ຽວກັບການເງິນແຕ່ລະຫ້ອງການອ້ອມຂ້າງເມືອງ ໄດ້ຮັບຮູ້ ແລະ ເຂົ້າໃຈແນວທາງປ່ຽນແປງໃໝ່ຂອງພັກ-ຂອງລັດຖະບານທີ່ໄດ້ວາງອອກໃຫ້ເຂັ້ມງວດ ເພຶ່ອເປັນການປັບປຸງໃຫ້ຖືກຕ້ອງສອດຄອງກັບສະພາບຕົວຈິງ ແລະ ເຮັດໃຫ້ວຽກງານດັ່ງໄດ້ຮັບການພັດທະນາ, ວອງໄວຂຶ້ນກ່ວາເກົ່າ ຮັບປະກັນໄດ້ທັງປະລິມານ ແລະຄຸນນະພາບ
ໂອກາດດຽວກັນນີ້ ທ່ານ ວັນນາ ຄໍາສີປະເສີດ ຮອງເລຂາພັກເມືອງ ປະທານອົງການປົກຄອງເມືອງ ໄດ້ມີຄໍາເຫັນເນັ້ນໜັກ ໃຫ້ທຸກພາກສວນຂອງເມືອງ ໂດຍສະເພາະຫ້ອງການພາຍໃນເມືອງ ຈົ່ງເປັນເຈົ້າການໃນການຈັດຕັ້ງປະຕິບັດ ຄົ້ນຄວ້າກໍາແໜ້ນບັນດາເນື້ອໃນ, ຈິດໃຈ ຂອງບັນດາເອກະສານຕ່າງໆ ທີ່ນໍາມາເຜີຍແຜ່ໃນຄັ້ງນີ້ ນໍາໃນໄປໄໝູນໃຊ້ເຂົ້າໃນໜ້າທີ່ວຽກງານຂອງແຕ່ລະຫ້ອງການອ້ອມຂ້າງເມືອງ ໃນການຈັດຕັ້ງປະຕິບັດນະໂຍບາຍຕ່າງໆ ເພື່ອໃຫ້ວຽກງານດັ່ງກ່າວໄດ້ຮັບຜົນສໍາເລັດຕາມລະດັບຄາດໝາຍທີ່ກໍານົດໃວ້.
ຂ່າວ: ອຸ່ນຄໍາ ຂັນວາລິດ
