ທ່ານ ພົນຈັດຕ
ະວາ ສຸກພະຈັນ ສີລາເພັດ ປະທານຄະນະກຳມະການປົກຄອງແຂວງບໍ່ແກ້ວ ພ້ອມດ້ວຍພະແນກການກະສີກຳ ແລະ ສິ່ງແວດລ້ອມແຂວງ ແລະ ເມືອງຫ້ວຍຊາຍ ໄດ້ລົງຕິດຕາມ ແລະ ຊຸກຍູ້ການຜະລິດພືດຜັກຂອງປະຊາຊົນຢູ່ ບ້ານປຸງນາໜູນ ແລະ ກຸ່ມປູກຜັກເຂດບ້ານນ້ຳຄຳ, ເມືອງຫ້ວຍຊາຍ, ແຂວງບໍ່ແກ້ວ ໃນວັນທີ 12 ກັນຍາ 2026 ນີ້, ເພື່ອຊຸກຍູ້ ແລະ ສົ່ງເສີມໃຫ້ປະຊາຊົນເພີ່ມການຜະລິດພືດຜັກທີ່ມີຄຸນນະພາບ, ສອດຄ່ອງຕາມຄວາມຕ້ອງການຂອງຕະຫຼາດ, ໃນການສະໜອງໃຫ້ການບໍລິໂພກພາຍໃນແຂວງຢ່າງພຽງພໍ ເພື່ອຫຼຸດຜ່ອນການນຳເຂົ້າພືດຜັກຈາກຕ່າງປະເທດ.
ໃນໂອກາດນີ້, ທ່ານປະທານຄະນະກຳມະການປົກຄອງແຂວງພ້ອມຄະນະ ໄດ້ຮັບຟັງການລາຍງານສະພາບການຜະລິດ ເປັນຕົ້ນແມ່ນ ແນວພັນຊະນິດພືດທີ່ປູກ, ເນື້ອທີ່ຜະລິດ, ປະລິມານຜົນຜະລິດ, ຕົ້ນທຶນ, ການສະໜອງປະເພດພືດຜັກ, ຕະຫຼາດ, ລາຄາຈຳໜ່າຍ ແລະ ລາຍຮັບຂອງຄອບຄົວ. ພ້ອມກັນນັ້ນ, ກໍໄດ້ຮັບຮູ້ນັບທັງບັນຫາຄວາມຫຍຸ້ງຍາກທີ່ພົບພໍ້ ເຊັ່ນ:ບັນຫາໄຟຟ້າເຂົ້າໃນການຜະລິດທີ່ຍັງບໍ່ທັນສະດວກ, ຕົ້ນທຶນປັດໄຈການຜະລິດສູງ ແລະ ການເຂົ້າເຖິງແຫຼ່ງທຶນ, ຄວາມຮູ້ດ້ານວິຊາການກ່ຽວກັບການປູກ ແລະ ຕະຫຼາດຮອງຮັບຜົນຜະລິດ, ການນຳເອົາພືດຜັກເຂົ້າມາຈາກຕ່າງແຂວງຕ່າງປະເທດ ໄດ້ສົ່ງຜົນກະທົບຕໍ່ລາຄາ ແລະ ການຈຳໜ່າຍຜົນຜະລິດຂອງປະຊາຊົນພາຍໃນແຂວງ
ເພື່ອແກ້ໄຂບັນຫາດັ່ງກ່າວ, ທ່ານປະທານຄະນະກຳມະການປົກຄອງແຂວງ ໄດ້ແນະນຳໃຫ້ພາກສ່ວນກ່ຽວຂ້ອງສືບຕໍ່ຊຸກຍູ້ປະຊາຊົນ ນຳໃຊ້ເຕັກນິກການຜະລິດທີ່ເໝາະສົມ, ເລືອກພັນພືດທີ່ດີ, ວາງແຜນການຜະລິດໃຫ້ສອດຄ່ອງກັບລະດູການ ແລະ ຄວາມຕ້ອງການຂອງຕະຫຼາດ, ພ້ອມດຽວກັນນີ້, ໃຫ້ເອົາໃຈໃສ່ສ້າງກຸ່ມຜະລິດພືດຜັກ ເພື່ອໃຫ້ສາມາດຮ່ວມກັນວາງແຜນການຜະລິດ, ຈັດຫາແນວພັນ, ກຳນົດປະລິມານຜະລິດ ແລະ ເຂັ້ມແຂງໃນການຫາຕະຫຼາດຮອງຮັບ ທັງໝົດນີ້ເພື່ອແນ່ໃສ່ການຫຼຸດຜ່ອນການນຳເຂົ້າພືດຜັກຈາກຕ່າງປະເທດ ທີ່ແຂວງເຮົາສາມາດຜະລິດໄດ້ເອງ, ເປັນການສ້າງຄວາມເຂັ້ມແຂງໃຫ້ການຜະລິດພາຍໃນ, ເພີ່ມລາຍຮັບໃຫ້ແກ່ຄອບຄົວປະຊາຊົນ, ໃນການຜະລິດພືດຜັກໃຫ້ມີຄຸນນະພາບ, ມີປະລິມານພຽງພໍ ແລະ ສາມາດສະໜອງໃຫ້ຕະຫຼາດ ແລະ ການບໍລິໂພກພາຍໃນແຂວງບໍ່ແກ້ວ.
ຂ່າວ: ສາຍສະໝອນ ແກ້ວວິສິດ