ໃນຕອນເຊົ້າຂອງວັນທີ 02 ກັນຍາ 2026 ນີ້ ຫ້ອງການຍຸຕິເມືອງ ຜາອຸດົມ ແຂວງບໍ່ແກ້ວ ນໍາໂດຍ ທ່ານ ຄໍາປິວ ປານຄຳ ພ້ອມດ້ວຍທິມງານ ໄດ້ລົງໂຄສະນາເຜີຍແຜ່ກົດໝາຍ ແລະ ຕັ້ງໂຕະໃຫ້ຄຳປຶກສາທາງດ້ານກົດໝາຍແບບເຄື່ອນທີ່ ຢູ່ບ້ານມົກໂຊະ
ໂດຍການເປັນປະທານຂອງ ທ່ານ ຄໍາປິວ ປານຄໍາ ຫົວໜ້າຫ້ອງການຍຸຕິທໍາເມືອງ ຜາອຸດົມ, ມີຄະນະທິມງານຂອງໂຄງການ ລາວ/035, ລາວ/036, ລາວ/037, ລາວ/338 ແລະ ຜູ້ປະສານງານໂຄງການ ຂັ້ນສູນກາງ, ຂັ້ນແຂວງ, ຂັ້ນເມືອງເຂົ້າຮ່ວມ ໂດຍການສະໜັບສະໜູນດ້ານງົບປະມານ ຂອງໂຄງການລາວ 338 ປະຈໍາແຂວງບໍ່ແກ້ວ
ຈຸດປະສົງໃນການລົງຈັດຕັ້ງປະຕິບັດວຽກງານຍຸຕິທໍາຮາກຖານຢູ່ຂັ້ນບ້ານ ໃນຄັ້ງນີ້ແມ່ນ: ການໂຄສະນາເຜີຍແຜ່ກົດໝາຍ, ຕັ້ງໂຕະໃຫ້ຄໍາປຶກສາທາງດ້ານກົດໝາຍແບບເຄື່ອນທີ ແລະ ການລົງຕິດຕາມຊຸກຍູ້ຂອງໂຄງການຜູ້ໃຫ້ທຶນ, ເພື່ອເຮັດໃຫ້ການຈັດຕັ້ງບ້ານ ແລະ ປະຊາຊົນບັນດາເຜົ່າໄດ້ຮັບຮູ້ ແລະ ເຂົ້າໃຈຕໍ່ແນວທາງນະໂຍບາຍຂອງພັກ, ລັດຖະທໍາມະນູນ, ກົດໝາຍ ແລະ ລະບຽບການຂອງລັດທີວາງອອກໃນແຕ່ລະໄລຍະ, ເພື່ອຍົກສູງສະຕິໃນການເຄົາລົບກົດໝາຍ, ຫັນການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍເທື່ອລະກ້າວ. ກົດໝາຍທີ່ນໍາມາໂຄສະນາເຜີຍແຜ່ມີຄື: ດໍາລັດ 77/ລບ ວ່າດ້ວຍການຊ່ວຍເຫຼື່ອທາງດ້ານກົດໝາຍ, ປະມວນກົດໝາຍແພ່ງບາງມາດຕາ(ຄອບຄົວ, ຂໍ້ຜູກພັນໃນສັນຍາ-ນອກສັນຍາ) ແລະ ກົດໝາຍວ່າດ້ວຍການຄ້າມະນຸດ.
ໃນຕອນທ້າຍ ທ່ານ ຄໍາປິວ ປານຄໍາ ຫົວໜ້າຫ້ອງການ ຍຸຕິທໍາເມືອງ ໄດ້ສະແດງຄວາມຍ້ອງຍໍຊົມເຊີຍ ຕໍ່ຄະນະປົກຄອງບ້ານກ່ຽວກັບຜົນງານທີ່ສໍາເລັດໃນໄລຍະຜ່ານມາ ແລະ ທ່ານກໍ່ຍັງໄດ້ ເໜັ້ນໜັກ ໃຫ້ເອົາໃຈໃສ່ສຶກສາອົບຮົມດ້ານການເມືອງ-ແນວຄິດໃຫ້ແກ່ພໍ່ແມ່ປະຊາຊົນບັນດາເຜົ່າ ໃຫ້ມີສະຕິຕື່ນຕົວເຄົາລົບປະຕິບັດກົດໝາຍ, ເຕົ້າໂຮມຄວາມສາມັກຄີພາຍໃນບ້ານໃຫ້ມີຄວາມສະຫງົບເປັນລະບຽບຮຽບຮ້ອຍ
ພາບຂ່າວ: ນາງ ພອນ ຈະເລີນຜົນ