ໃນຕອນບາຍ ຂອງວັນທີ 2 ມິຖຸນາ 2026ນີ້ ໄດ້ເກີດເຫດອັກຄີໄພ ໄຟໄໝ້ຮ້ານຂາຍເຄື່ອງວັດສະດຸກໍ່ສ້າງ ແລະ ເຄື່ອງຍ່ອຍທົ່ວໄປ ຂອງຜູ້ປະກອບການຄົນຊັນຊາດຈີນ ຢູ່ບ້ານສົມສະຫວ່າງ, ເມືອງຜາອຸດົມ, ແຂວງບໍ່ແກ້ວ, ເຊິ່ງຮ້ານຫຼັງດັ່ງກ່າວ ຝາແມ່ນອ້ອມດ້ວຍສັງກະສີ, ຫຼັງຄາມຸງດ້ວຍແຜນອາລູຊິງ ທາງໃນເປັນບ່ອນວາງຂາຍເຫຼັກເສັ້ນ ແລະ ເກັບມ້ຽນເຄື່ອງຍ່ອຍທົ່ວໄປ, ຕາມການລາຍງານຂອງຜູ້ເຫັນເຫດການເຂດໄກ້ຄຽງ ໃຫ້ຮູ້ວ່າ: ເວລາປະມານ 12 ໂມງປາຍ ໄດ້ເຫັນຄວັນໄຟເປັນແປວອອກມາຈາກຂ້າງໃນທາງຫຼັງຂອງຮ້ານ ຈິ່ງໄດ້ແຈ້ງໃຫ້ເຈົ້າຂອງຮ້ານໄດ້ຮັບຮູ້ ເພື່ອມາເປີດປະຕູລາກຂື້ນ ໃນນັ້ນໄຟແມ່ນໄດ້ໄໝ້ ແລະ ລຸກລາມໄປຢ່າງວອງໄວ, ຂະນະດຽວກັນນັ້ນ ຈຶ່ງໄດ້ແຈ້ງເຈົ້າໜ້າທີສອງກຳລັງ ປກຊ-ປກສ, ໜ່ວຍງານດັບເພີງຂອງ ປກສ ເມືອງ, ພໍ່ແມ່ປະຊາຊົນ ມາຊ່ວຍກັນສະກັດກັ້ນບໍ່ໃຫ້ໄຟລາມໄປເປັນວົງກວ້າງ, ຕິດໃສ່ເຮືອນໄກ້ຄຽງ ແລະ ສາມາດຄວບຄຸມໄຟໄດ້ຢ່າງວອງໄວ, ເຫດການດັ່ງກ່າວໂຊກດີ ບໍ່ມີຜູ້ໄດ້ຮັບບາດເຈັບ ແລະເສຍຊີວິດ. ໃນນີ້, ມີສິ່ງຂອງເຄື່ອງອຸປະກອນຕ່າງໆໃນຮ້ານໄດ້ເສຍຫາຍຫຼາຍສົມຄວນ.
ສ່ວນສາເຫດ ແລະ ຜົນເສຍຫາຍ ເຈົ້າໜ້າທີ່ ພາກສ່ວນທີ່ກ່ຽວຂ້ອງ ພວມເລັງສືບສວນສອບສວນ ຫາສາເຫດ ແລະ ຈະແຈ້ງໃຫ້ພໍ່ແມ່ປະຊາຊົນໄດ້ຮັບຊາບພາຍຫຼັງ. ສະນັ້ນ, ທັງພັກ-ລັດຂັ້ນເທິງ ກໍ່ຄືພາກສ່ວນທີ່ກ່ຽວຂ້ອງ ຈິ່ງຂໍຮຽກຮ້ອງມາຍັງທຸກພາກສ່ວນໃນສັງຄົມ ໃຫ້ມີສະຕິລະວັງຕົວ ໃຫ້ຫຼາຍຂື້ນ ໃນການໃຊ້ຟືນໄຟ, ໄຟຟ້າພາຍໃນຄົວເຮືອນຂອງທ່ານ, ກ່ອນຈະອອກຈາກບ້ານ ຈາກເຮືອນຕ້ອງມອດຟືນໄຟ ແລະ ໄຟຟ້າພາຍໃນເຮືອນຂອງທ່ານ ທຸກຄັ້ງ ເພື່ອຄວາມປອດໄພທັງຊີວິດ ແລະ ຊັບສິນຂອງທ່ານ.
ທັງນີ້, ກໍ່ເພື່ອເປັນການຫຼີກລ່ຽງຄວາມເສຍຫາຍທາງດ້ານຊັບສິນທີ່ເກີດຈາກອັກຄີໄພຕ່າງໆ.
ຂ່າວ-ພາບ: ພອນສະຫວັນມະນີສີ.
ຂ່າວສານ: ຄະນະໂຄສະນາອົບຮົມ ເມືອງຜາອຸດົມ. 3. 6. 2026.
