ເນື່ອງໃນໂອກາດ ວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ວັນທີ 1 ມິຖຸນາ ທີ່ກຳລັງຈະໝູນວຽນມາຮອດອີກວາລະໜຶ່ງ, ທົ່ວສັງຄົມລາວ ຕັ້ງແຕ່ພາກລັດ, ເອກະຊົນ ຕະຫຼອດຮອດພໍ່ແມ່ປະຊາຊົນ ແລະ ຊາວໜຸ່ມເຍົາວະຊົນ ຕ່າງກໍກຳລັງກະກຽມຄວາມພ້ອມຢ່າງຂະຫມີຂະໝັນ ເພື່ອເຂົ້າຮ່ວມຂະບວນການປູກຕົ້ນໄມ້ ປະຈຳປີ 2026 ຢ່າງເປັນຂະບວນຟົດຟື້ນ ແລະ ມີຄວາມໝາຍເລິກເຊິ່ງ.
ວັນປູກຕົ້ນໄມ້ແຫ່ງຊາດໃນປີນີ້ ບໍ່ພຽງແຕ່ເປັນການປູກຕາມຮີດຄອງປະເພນີເທົ່ານັ້ນ, ແຕ່ເປັນການຢ້ຳຄືນເຖິງຄວາມມຸ່ງໝັ້ນຂອງ ສປປ ລາວ ໃນການເພີ່ມເນື້ອທີ່ປົກຫຸ້ມຂອງປ່າໄມ້ໃຫ້ໄດ້ 70% ຂອງເນື້ອທີ່ທົ່ວປະເທດ, ທັງເປັນການຮັບມືກັບບັນຫາການປ່ຽນແປງສະພາບພູມອາກາດ (ໂລກຮ້ອນ) ທີ່ກຳລັງສົ່ງຜົນກະທົບຕໍ່ພວກເຮົາໃນປັດຈຸບັນ.
ປູກຕົ້ນໄມ້ໃນໃຈຄົນ: ສ້າງຈິດສຳນຶກຮັກແພງທຳມະຊາດເຊິ່ງປີນີ້, ມີຫຼາຍພາກສ່ວນໄດ້ຫັນມາເນັ້ນໃສ່ການ “ປູກແລ້ວຕ້ອງລອດ” ແລະ ການສ້າງຈິດສຳນຶກໃຫ້ແກ່ຄົນຮຸ່ນໃໝ່ ໂດຍການເຊື່ອມໂຍງ ວັນປູກຕົ້ນໄມ້ ແລະ ວັນເດັກນ້ອຍສາກົນ ເຂົ້າກັນຢ່າງກົມກຽວ:
ຢູ່ບັນາໂຮງຮຽນ ຈະມີການຈັດກິດຈະກຳໃຫ້ເດັກນ້ອຍໄດ້ຮຽນຮູ້ວິທີການປູກ ແລະ ບົວລະບັດຮັກສາຕົ້ນໄມ້ ເພື່ອໃຫ້ເຂົາເຈົ້າເຕີບໃຫຍ່ໄປພ້ອມກັບຄວາມຮັບຜິດຊອບຕໍ່ສິ່ງແວດລ້ອມແຕ່ຕ້ອງການເລືອກພັນໄມ້: ເນັ້ນໃສ່ການປູກໄມ້ທີ່ມີຄຸນຄ່າທາງເສດຖະກິດໃນໄລຍະຍາວ ເຊັ່ນ: ໄມ້ດູ່, ໄມ້ແຕ້ຂ່າ, ໄມ້ຍາງ ແລະ ໄມ້ກິນໝາກຕ່າງໆ ຢູ່ໃນຂອບເຂດໂຮງຮຽນ, ຫ້ອງການ, ວັດວາອາຮາມ ແລະ ສວນສາທາລະນະ. ຮຽກຮ້ອງເຖິງທຸກພາກສ່ວນໃນສັງຄົມ
ເພື່ອເຮັດໃຫ້ວັນສຳຄັນນີ້ມີຄວາມໝາຍຢ່າງແທ້ຈິງ, ພາກສ່ວນກ່ຽວຂ້ອງໄດ້ອອກມາດົນນະລົງ ແລະ ເຊີນຊວນມາຍັງ:ພໍ່ແມ່ປະຊາຊົນ ແລະ ທຸກຄອບຄົວ: ນຳພາລູກຫຼານປູກຕົ້ນໄມ້ຢ່າງໜ້ອຍຄົນລະ 1 ຕົ້ນ ຢູ່ອ້ອມຮົ້ວອ້ອມເຮືອນ ຫຼື ພື້ນທີ່ທຳມາຫາກິນຂອງຕົນ.
ພາກສ່ວນທຸລະກິດ ແລະ ອົງກອນ: ຮ່ວມເປັນເຈົ້າພາບໃນການສະໜັບສະໜູນເບ້ຍໄມ້ ຫຼື ຈັດກິດຈະກຳປູກປ່າສາມັກຄີ ພາຍໃນອົງກອນ ເພື່ອສະແດງຄວາມຮັບຜິດຊອບຕໍ່ສັງຄົມ.
ຕົ້ນໄມ້ທຸກຕົ້ນທີ່ພວກເຮົາປູກໃນວັນທີ 1 ມິຖຸນາ ນີ້ ຈະກາຍເປັນຮົ່ມເງົາ, ເປັນແຫຼ່ງອາກາດບໍລິສຸດ ແລະ ເປັນຊັບສິນທາງທຳມະຊາດທີ່ລ້ຳຄ່າ ທີ່ຈະມອບເປັນມໍລະດົກໃຫ້ແກ່ລູກຫຼານລາວໃນອະນາຄົດ. ຂໍເຊີນຊວນທຸກທ່ານ ມາຮ່ວມແຮງຮ່ວມໃຈກັນ ປ່ຽນແຜ່ນດິນລາວແຂວງບໍ່ແກ້ວໃຫ້ຂຽວງາມສະອາດຕາໄປພ້ອມໆກັນ.
#ໂດຍຜ: ເງິນຫລົງ ຈິດພູວົງ.
