ໃນຕອນເຊົ້າວັນທີ່ 8 ພຶດສະພາ 2026 ນີ້, ຫ້ອງເຕັກນິກ ກອງບັນຊາການທະຫານແຂວງບໍ່ແກ້ວ ໄດ້ຈັດຕັ້ງສະຫຼຸບວຽກງານຮອບດ້ານ ປະຈຳໄຕມາດ l ແລະ ວາງທິດທາງແຜນການ ປະຈຳໄຕມາດ II ປີ 2026. ຢູ່ທີ່ສະໂມສອນຫ້ອງເຕັກນິກ ໂດຍການເປັນປະທານຂອງສະຫາຍ ພັັນໂທ ຄຳໄພ ທິບບົວວັນ ຄະນະພັກກອງບັນຊາການ ຫົວໜ້າຫ້ອງເຕັກນິກ ກອງບັນຊາການທະຫານແຂວງບໍ່ແກ້ວ, ມີຄະນະພັກ – ຄະນະບັນຊາ ພະແນກການ ຕະຫຼອດຮອດພະນັກງານ-ນັກຮົບ ທົ່ວຫ້ອງເຕັກນິກເຂົ່າຮ່ວມ.
ສະຫາຍ ພັນໂທ ບຸນທັນ ແສງຄຳມີໄຊ ຫົວໜ້າພະແນກແຜນການ ຫ້ອງເຕັກນິກ ທະຫານແຂວງບໍ່ແກ້ວ ໄດ້ສະຫຼຸບຕີລາຄາການຈັດຕັ້ງປະຕິບັດວຽກງານຮອບດ້ານປະຈຳໄຕມາດ I ປີ 2026 ເຊິ່ງຕະຫຼອດໄລຍະ 3 ເດືອນຜ່ານມາ ຄະນະພັກ-ຄະນະບັນຊາຫ້ອງເຕັກນິກໄດ້ສຶກສາອົບຮົມການເມືອງນໍາພາແນວຄິດໃຫ້ພະນັກງານ – ນັກຮົບພາຍໃນຫ້ອງເຕັກນິກໃຫ້ໜັກແໜ້ນເພື່ອຕ້ານປະກົດການຫຍໍ້ທໍ້ທີ່ຈະເກີດຂື້ນ.ຊີ້ນຳບັນດາພະແນກການໃນການຈັດຕັ້ງປະຕິບັດໜ້າທີ່ວິຊາສະເພາະໃຫ້ມີຜົນສຳເລັດ ແລະ ຊີ້ນຳສ້ອມແປງລົດທີ່ຍັງຄ້າງຄາ ແລະ ຟື້ນຟູພາຫະນະເປ່ເພ ປະຕິບັດຕາມທິດຊີ້ນໍາຂອງກອງບັນຊາການທະຫານແຂວງບໍ່ແກ້ວ ໃນໄລຍະ 3 ເດືອນ ຜ່ານມາ ສ້ອມແປງລົດທັງໝົດ: 20 ຄັນ, 34 ຄັ້ງ, ສ້ອມແປງຂະໜາດໜັກ 0 ຄັ້ງ, ສ້ອມແປງຂະໜາດກາງ: 14 ຄັ້ງ, ສ້ອມແປງຂະໜາດເບົາ: 06 ຄັ້ງ, ສ້ອມແປງຢູ່ ບັນດາກົມກອງ 01 ຄັ້ງ, ເອົາລົດເຂົ້າສ້ອມແປງຢູ່ຮ້ານເອກະຊົນ: 01 ຄັ້ງ, ສ້ອມແປງເຮືອ 0 ລຳ,ເອົາໃຈໃສ່ປົກປັກຮັກສາບົວລະບັດຜັດເຊັດອຸປະກອນເຄື່ອງໄຊ້ພາຫະນະ,ອາວຸດຕ່າງໆທີ່ມີຢູ່ແລ້ວ, ບໍ່ໃຫ້ເປ່ເພເສຍຫາຍໂດຍບໍ່ມີເຫດຜົນ, ຊີ້ນໍາວິຊາການໃຫ້ຍົກສູງຄວາມຮັບຜິດຊອບກວດກາສະພາບເຕັກນິກ ເພື່ອຄຸ້ມຄອງ ແລະນໍາໃຊ້ໃຫ້ເກີດປະສິດທິຜົນສູງ, ປົກປັກຮັກສາຕຶກອາຄານ, ຫ້ອງການ, ເຮືອນກິນ, ເຮືອນນອນ, ສາງຄັງໃຫ້ມີຄວາມສະອາດຈົບງາມ, ສູ້ຊົນແກ້ໄຂຊີວິດການເປັນຢູ່ ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ເພື່ອນຳພາກົມກອງ ໃຫ້ມີບາດກ້າວຂະຫຍາຍຕົວ.ທ້າຍພິທີຍັງໄດ້ມອບໃບຍ້ອງຍໍຊາວໜຸ່ມຕົວແບບ 4 ບຸກອີກດ້ວຍ.
ໂອກາດນີ້, ສະຫາຍ ພັນໂທ ຄຳໄພ ທິບບົວວັນ ປະທານພິທີ ໄດ້ສະແດງຄວາມຊົມເຊີຍຕໍ່ຜົນສໍາເລັດທີ່ກົມກອງຍາດມາໄດ້ໃນໄລຍະຜ່ານມາ, ພ້ອມທັງເນັ້ນໜັກໃຫ້ບັນດາສະຫາຍ ຈົ່ງພ້ອມກັນສືບຕໍ່ຍົກສູງຄວາມຮັບຜິດຊອບໜ້າທີ່ການເມືອງຂອງຕົນ, ເອົາໃຈໃສ່ເປັນເຈົ້າການສຶກສາອົບຮົມການເມືອງ – ແນວຄິດໃຫ້ພະນັກງານສະມາຊິກພັກ – ນັກຮົບແຕ່ລະຂັ້ນໃຫ້ໜັກແໜ້ນທາງດ້ານການເມືອງແນວຄິດ, ເຂັ້ມແຂງທາງດ້ານການຈັດຕັ້ງ, ມືອາຊີບທາງດ້ານວິຊາສະເພາະ ແລະ ມີຄຸນສົມບັດສິນທຳປະຕິວັດ, ເອົາໃຈໃສ່ປັບປຸງກໍ່ສ້າງກົມກອງໃຫ້ມີຄຸນນະພາບ, ເພີ່ມທະວີຄວາມສາມັກຄີເປັນເອກກະພາບ, ມີແບບແຜນວິທີເຮັດວຽກທີ່ທັນສະໄໝ, ສືບຕໍ່ປະຕິບັດໜ້າທີ່ວິຊາສະເພາະຂອງຕົນທີ່ໄດ້ຮັບການມອບໝາຍໃຫ້ມີຜົນສຳເລັດ.
ຂ່າວໂດຍ: ນີ່ ທຳມະວົງ.
