ໃນວັນທີ 22 ພຶດສະພາ 2026 ນີ້, ຢູ່ທີ່ເມືອງປາກທາ ແຂວງບໍ່ແກ້ວ ໄດ້ມີການຈັດກອງປະຊຸມໂຄສະນາເຜີຍແຜ່ວຽກງານປົກປ້ອງທາງສັງຄົມ ໃຫ້ແກ່ແຮງງານນອກລະບົບ ເພື່ອແນໃສ່ສ້າງຄວາມຮັບຮູ້ ແລະ ຊຸກຍູ້ໃຫ້ເຂົ້າເຖິງລະບົບປະກັນສັງຄົມພາກສະໝັກໃຈຢ່າງທົ່ວເຖິງ.ໂດຍການເປັນປະທານໂດຍ ທ່ານ ແກ້ວລາ ນໍລະສິງ ປະທານສະຫະພັນກຳມະບານແຂວງບໍ່ແກ້ວ, ທ່ານ ເກດແກ້ວ ນິສະຫວັດ ຈາກຫ້ອງການປະກັນສັງຄົມແຂວງ,ມີບັນດາພະນັກງານຂັ້ນແຂວງ, ເມືອງ, ຕາງໜ້າສະມາຊິກກຸ່ມແຮງງານນອກລະບົບ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໃນວາລະກອງປະຊຸມ, ຄະນະຮັບຜິດຊອບໄດ້ລາຍງານໂດຍຫຍໍ້ ກ່ຽວກັບສະພາບການເຄື່ອນໄຫວວຽກງານຂອງກຸ່ມແຮງງານນອກລະບົບໃນໄລຍະ 1 ປີຜ່ານມາ, ເຊິ່ງໄດ້ເຫັນເຖິງຜົນສຳເລັດ, ຂໍ້ສະດວກ ແລະ ສິ່ງທ້າທາຍຕ່າງໆ.ຈາກນັ້ນ, ຕາງໜ້າອົງການປະກັນສັງຄົມແຂວງບໍ່ແກ້ວ ກໍໄດ້ເຜີຍແຜ່ຂໍ້ມູນ-ຄວາມຮູ້, ສ້າງຄວາມເຂົ້າໃຈກ່ຽວກັບຜົນປະໂຫຍດ ແລະ ເງື່ອນໄຂຕ່າງໆ ໃນການເຂົ້າເຖິງລະບົບປະກັນສັງຄົມພາກສະໝັກໃຈ ເພື່ອໃຫ້ແຮງງານນອກລະບົບໄດ້ຮັບຊາບເຖິງສິດຜົນປະໂຫຍດທີ່ຈະໄດ້ຮັບໃນການປົກປ້ອງດ້ານສະຫວັດດິການສັງຄົມ. ພ້ອມທັງ ສົນທະນາ ແລກປ່ຽນຄຳຄິດຄຳເຫັນ ແບບຖາມ-ຕອບ ຢ່າງກົງໄປກົງມາ ເພື່ອແກ້ໄຂຂໍ້ຂ້ອງໃຈຂອງຜູ້ເຂົ້າຮ່ວມ, ການທາບທາມຄວາມສົນໃຈ ຂອງກຸ່ມເປົ້າໝາຍຕໍ່ກັບການສະໝັກເຂົ້າເປັນສະມາຊິກປະກັນສັງຄົມຕື່ມອີກ.
ໂອກາດນິ້. ທ່ານ ແກ້ວລາ ນໍລະສິງ ປະທານສະຫະພັນກຳມະບານແຂວງບໍ່ແກ້ວ ໄດ້ມີຄຳເຫັນໂອ້ລົມ ແລະ ເນັ້ນໜັກຕໍ່ຫຼາຍບັນຫາສຳຄັນ ເປັນຕົ້ນແມ່ນການເພີ່ມທະວີຄວາມຮັບຮູ້ ແລະ ເນັ້ນໜັກໃຫ້ທຸກພາກສ່ວນເອົາໃຈໃສ່ໂຄສະນາເຜີຍແຜ່ໃຫ້ແຮງງານນອກລະບົບເຫັນໄດ້ເຖິງຄວາມສຳຄັນ ແລະ ປະໂຫຍດໄລຍະຍາວຂອງການມີປະກັນສັງຄົມ. ຮຽກຮ້ອງໃຫ້ຫ້ອງການປະກັນສັງຄົມ ແລະ ພາກສ່ວນກ່ຽວຂ້ອງ ຮ່ວມມືກັນຢ່າງໃກ້ຊິດ ໃນການອຳນວຍຄວາມສະດວກ ແລະ ເຂົ້າເຖິງກຸ່ມແຮງງານໃຫ້ກວ້າງຂວາງກວ່າເກົ່າ.ເພື່ອຍົກສູງຄຸນນະພາບຊີວິດ ຮັບປະກັນໃຫ້ແຮງງານທຸກຄົນ ໄດ້ຮັບການປົກປ້ອງທາງສັງຄົມຢ່າງທົ່ວເຖິງ, ຫຼຸດຜ່ອນຄວາມສ່ຽງໃນການດຳລົງຊີວິດ ແລະ ສ້າງຄວາມໝັ້ນຄົງໃຫ້ແກ່ຄອບຄົວ.ກອງປະຊຸມ ຄັ້ງນິ້, ເຊິ່ງຖືເປັນກ້າວເດີນທີ່ສຳຄັນໃນການຂະຫຍາຍຕາໜ່າງການປົກປ້ອງທາງສັງຄົມ ໄປສູ່ພາກສ່ວນແຮງງານນອກລະບົບ ຢູ່ເມືອງປາກທາ ໃຫ້ມີຄວາມເຂັ້ມແຂງຂຶ້ນເລື້ອຍໆ.
#ໂດຍ: ເງິນຫຼົງ ຈິດພູວົງ.
#ພາບ: ພາກສ່ວນກ່ຽວຂ້ອງ .
#ແຂວງບໍ່ແກ້ວ #ເມືອງປາກທາ #ປະກັນສັງຄົມພາກສະໝັກໃຈ #ແຮງງານນອກລະບົບ #ສະຫະພັນກຳມະບານ.
