ວັນທີ 4 ພຶດສະພາ 2026 ນີ້ ຢູ່ທີ່ກອງບັນຊາການ ປກສ ເມືອງເມິງ ແຂວງບໍ່ແກ້ວ ໄດ້ປະກາດແຕ່ງຕັ້ງປະທານ, ຮອງປະທານ, ຜູ້ປະຈຳການ ແລະ ຄະນະກຳມະ ການ ປ້ອງກັນຊາດ-ປ້ອງກັນຄວາມສະຫງົບ ຂັ້ນເມິງ ໂດຍການເປັນປະທານຂອງສະຫາຍ ພັອ ແສງເພັດ ແສງມະນີ ກໍາມະການພັກແຂວງ, ຫົວໜ້າການທະຫານກອງບັນຊາການ ປກຊ ແຂວງບໍ່ແກ້ວ ມີບັນດາຄະນະປະຈຳພັກເມືອງ, ຄະນະພັກ-ຄະນະບັນຊາ ສອງກອງບັນຊາການ ປກຊ-ປກສ, ຫົວໜ້າລັດວິສາຫະກິດພາຍໃນເມືອງ, ຫົວໜ້າຫ້ອງການອ້ອມຂ້າງເມືອງ, ນາຍ ແລະ ພົນທະຫານ, ນາຍ ແລະພົນຕໍາຫຼວດພາຍໃນກົມກອງເຂົ້າຮ່ວມ.
ສະຫາຍ ພັນເອກ ບຸນຈັນ ສີທະບູນ ຫົວໜ້າຫ້ອງການ ຄະນະກໍາມະການປ້ອງກັນຊາດ-ປ້ອງກັນຄວາມສະຫງົບແຂວງບໍ່ແກ້ວ ໄດ້ຂຶ້ນຜ່ານມະຕິຕົກລົງຂອງຄະນະກຳມະການ ປກຊ-ປກສ ແຂວງບໍ່ແກ້ວ ສະບັບເລກທີ 15/ຄປກຊ-ຄປກສ.ບກ ວ່າດ້ວຍ ການແຕ່ງຕັ້ງປະທານ ຮອງປະທານ, ຜູ້ປະຈຳການ ແລະ ກຳມະການ ຄະນະກຳມະການປ້ອງກັນຊາດປ້ອງກັນຄວາມສະຫງົບ ເມືອງເມິງ ປະທານຄະນະກຳມະການປ້ອງກັນຊາດ-ປ້ອງກັນຄວາມສະຫງົບແຂວງບໍ່ແກ້ວ ຕົກລົງ: ແຕ່ງຕັ້ງ: ສະຫາຍ ສີວິໄລ ສີແສນດີ ເປັນປະທານຄະນະກຳມະການປ້ອງກັນຊາດ-ປ້ອງກັນຄວາມສະຫງົບ ເມືອງເມິງ; ສະຫາຍ ວັນນາ ຄໍາສີປະເສີດ ເປັນຮອງປະທານ; ສະຫາຍ ພັນໂທ ບຸນເພັດ ສິນໄຊຍະ ເປັນຮອງປະທານ-ທັງເປັນຜູ້ປະຈຳການ, ສະຫາຍ ພັນໂທ ຄໍາດີ ເກດພິນດາ ເປັນກຳມະການ ແລະ ສະຫາຍ ນິຍົມ ຄໍາພາ ເປັນກຳມະການ ຈາກນັ້ນ,ສະຫາຍ ວັນນາ ຄໍາສີປະເສີດ ຮອງເລຂາພັກເມືອງ ປະທານຄະນະກຳມະການປົກຄອງເມືອງເມິງ ໄດ້ລາຍງານສະພາບການຈັດຕັ້ງປະຕິບັດວຽກງານ ປ້ອງກັນຊາດ-ປ້ອງກັນຄວາມສະຫງົບໄລຍະຜ່ານມາ, ໂດຍໄດ້ຮັບ ການຊີ້ນໍາໂດຍກົງຈາກສູນກາງ, ແຂວງ ເຮັດໃຫ້ການເຄື່ອນໄຫວວຽກງານປ້ອງກັນຊາດ-ປ້ອງກັນຄວາມສະຫງົບ ພາຍໃນເມືອງເມິງ ໄດ້ຮັບໝາກຜົນສູງ, ໄດ້ເຄື່ອນໄຫວວຽກງານຕາມພາລະບົົດບາດ, ສິດ, ໜ້າທີ່ ທີ່ໄດ້ກໍານົດ, ເຊິ່ງໄດ້ສຸມທຸກສະຕິບັນຍາ ແລະ ເຫື່ອແຮງ ເຂົ້າໃນການປະຕິບັດສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດ ກໍ່ຄືການພັດທະນາແຂວງບໍ່ແກ້ວ, ເຮັດໃຫ້ເມືອງເມິງມິຄວາມສະຫງົບປອດໄພໂດຍພຶ້ນຖານ ຜ່ານການເຄື່ອນໄຫວ ແລະເຮັດໜ້າທີ່ຢ່າງຕັ້ງໜ້າຂອງພວກເຮົາໃນໄລຍະຜ່ານມາ ສາມາດແກ້ໄຂປະກົດການຫຍໍ້ທໍ້ຕ່າງໆ ທີ່ເກີດຂຶ້ນໃນທົ່ວເມືອງໄດ້ຫຼຸດໜ້ອຍຖອຍລົງ ແລະ ເຮັດໃຫ້ສະພາບລວມ ກໍ່ຄືສັງຄົມມີຄວາມສະຫງົບປອດໄພ.
ໃນໂອກາດດ່ຽວກັນນີ້ສະຫາຍ ພັອ ແສງເພັດ ແສງມະນີ ກໍາມະການພັກແຂວງ, ຫົວໜ້າການທະຫານກອງບັນຊາການ ປກຊ ແຂວງ ໄດ້ສະແດງຄວາມຍ້ອງຍໍຊົມເຊີຍຕໍ່ການນຳຂອງເມືອງກໍ່ຄືຄະນະກໍາມະການປ້ອງກັນຊາດ-ປ້ອງກັນຄວາມສະຫງົບເມືອງເມິງ ທີ່ໄດ້ນໍາພາ-ຊີ້ນຳ ວຽກງານປ້ອງກັນຊາດ-ປ້ອງກັນຄວາມສະຫງົບ ອັນໄດ້ ສ້າງພື້ນຖານໃຫ້ແກ່ຊີວິດການເປັນຢູ່; ພ້ອມທັງໄດ້ເນັ້ນໜັກໃຫ້ ສະຫາຍທີ່ຖືກແຕ່ງຕັ້ງເປັນປະທານ, ຮອງປະທານ, ຜູ້ປະຈຳການ ແລະ ກຳມະການ ຄະນະກຳມະການ ປ້ອງກັນຊາດ-ປ້ອງກັນຄວາມສະຫງົບ ເມືອງເມິງ ຕ້ອງເປັນເຈົ້າການນໍາພາ-ຊີ້ນໍາຂະແໜງການທີ່ກ່ຽວຂ້ອງຈັດຕັ້ງປະຕິບັດ ແລະຜັນຂະຫຍາຍແນວທາງ ປກຊ-ປກສ ທົ່ວປວງຊົນຮອບດ້ານຂອງພັກ ສອດຫ້ອຍເຂົ້າໃນຂະບວນການການຕົວຈິງໃຫ້ກວ້າງຂວາງ ແລະ ເລິກເຊິງ, ພ້ອມທັງເປັນໃຈກາງປະສານສົມທົບສຸມທຸກກໍາລັງແຮງເຮັດໃຫ້ເມືອງເມິງມີສະຖຽນລະພາບທາງດ້ານການເມືອງ, ມີຄວາມສະຫງົບປອດໄພ, ມີຄວາມເປັນລະບຽບຮຽບຮ້ອຍໃນສັງຄົມ, ເພີ່ມທະວີຄວາມສາມັກຄີພາຍໃນໃຫ້ແໜ້ນແຟ້ນ, ຮັບປະກັນການນໍາພາເດັດຂາດ, ໂດຍກົງຮອບດ້ານຂອງພັກ, ປັບປຸງກໍ່ສ້າງກໍາລັງໃຫ້ມີຄວາມໜັກແໜ້ນ, ເຂັ້ມແຂງ, ມີແບບແຜນທີທັນສະໄໝ, ຍົກສູງສະຕິກຽມພ້ອມສູ້ຮົບໃນທຸກພາວະ, ພົວພັນຮ່ວມມືຢ່າງຖືກຕ້ອງກັບຕ່າງປະເທດ, ເອົາໃຈໃສ່ຮັບປະກັນທາງດ້ານພະລາທິການ, ເຕັກນິກ ປັບປຸງຊີວິດການເປັນຢູ່ຕາມທິດນໍາເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ; ຄຽງຄູ່ກັບການພັດທະນາເສດຖະກິດ-ສັງຄົມໃຫ້ມີການພັດທະນາຂຶ້ນໄປເປັນກ້າວໆ.
