ວັນທີ 3 ເມສາ 2026 ຜ່ານມານີ້, ຢູ່ທີ່ບ້ານຜາດໍາ ເມືອງເມິງ, ແຂວງບໍ່ແກ້ວ ໄດ້ເປີດແຫຼ່ງທ່ອງທ່ຽວທໍາມະຊາດ ນໍ້າຕົກຕາດຫ້ວຍກາງ ໃຫ້ກຽດເຂົ້າຮ່ວມມີ ທ່ານ ສີວິໄລ ສີແສນດີ ກຳມະການພັກແຂວງ, ເລຂາຄະນະບໍລິຫານງານພັກເມືອງ,ມີທ່ານ ນາງ ບຸນຍົກ ແສງສະຫວ່າງ ກໍາມະການພັກແຂວງ, ຫົວໜ້າພະແນກວັດທະນະທໍາ ແລະ ການທ່ອງທ່ຽວແຂວງບໍ່ແກ້ວ ແລະ ທ່ານ ຫຸ່ມແກ້ວ ອ້ອຍແຂມທອງ ຮອງເລຂາພັກເມືອງ ປະທານກວດກາພັກ-ລັດເມືອງ, ມີບັນດາຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ-ຮອງຫ້ອງການ, ຜຸ້ປະກອບການ, ແຂກຖືກເຊີນແຕ່ລະພາກສວນພາຍໃນເມືອງເຂົ້າຮ່ວມ.
ໃນພິທີທ່ານ ໄມ່ແອ ກັນທະພອນ ນາຍບ້ານ ບ້ານຜາດໍາ ໄດ້ລາຍງານຫຍໍ້າ ກ່ຽວກັບປະຫວັດ ແລະ ການກະກຽມການເປີດແຫຼ່ງທ່ອງທ່ຽວ ຕາມການບອກເລົ່າຂອງຜູ້ເຖົ້າຜູ້ແກ່ໃຫ້ຮູ້ວ່າ: ໃນເມື່ອກ່ອນໄດ້ມີນາຍພານລ່າເນື້ອເຂົ້າມາລ່າເນື້ອຢູ່ຂອບເຂດບໍລິເວນດັ່ງກ່າວ ແລະ ໄດ້ພົບເຫັນນໍ້າຕົກຕາດແຫ່ງນີ້ທີ່ມີຄວາມງົດງາມ, ອຸດົມສົມບູນໄປດ້ວຍສັດປ່ານາໆຊະນິດ ປົກຫົ້ມດ້ວຍປ່າໄມ້ໃຫຍ່ທີຂຽວສົດງົດງາມ ໄດ້ມີພະຍາກວາງໂຕໜຶ່ງທີ່ປົກປັກຮັກສາສະຖານທີ່ແຫ່ງນີ້ອັນເຮັດໃຫ້ນາຍພານຜູ້ນັ້ນຢ້ານກົວ ແລະ ບໍ່ກ້າມາລ້າເນື້ອໃນບໍລິເວນນີ້ອີກ ນໍ້າຕົກຕາດຫ້ວຍກາງແມ່ນສະຖານທີ່ທ່ອງທ່ຽວທໍາມະຊາດແຫ່ງໜຶ່ງທີ່ມີຄວາມງົດງາມຕາມທໍາມະຊາດ ຖືກອ້ອມຮອບດ້ວຍທໍາມະຊາດ ແລະ ສາຍພູ ເຊິ່ງເໝາະສົມສໍາລັບການທ່ອງທ່ຽວເພື່ອພັກຜ່ອນຊົມທໍາມະຊາດບວກກັບສາຍນໍ້າອັນເຢັນໃສທີ່ຫາໃສບໍ່ໄດ້ອີກແລ້ວ ນໍ້ຕົກຕາດແຫ່ງນີ້ຫ່າງຈາກເທດສະບານເມືອງປະມານ 29 ກິໂລແມັດ, ທິດເໜືອຕິດກັບຊາຍແດນບ້ານຈອມແຈ້ງ, ທິດໃຕ້ຕິດກັບບ້ານຜາຂາວ, ທິດຕາເວັນອອກຕິດກັບຊາຍແດນບ້ານຕໍແລ ແລະ ທິດໃຕ້ຕິດກັບແມ່ນໍ້າຂອງ ຊາຍແດນລາວ – ມຽນມາ ມີເນື້ອທີ່ທັງໝົດ 108 ເຮັກຕາ; ໃນນີ້ກໍານົດໃຫ້ສໍາປະທານນໍາລັດເພື່ອພັດທະນາເປັນແຫຼ່ງທ່ອງທ່ຽວທາງທໍາມະຊາດມີ 4 ເຮັກຕາ ໃນໄລຍະຜ່ານມານໍ້າຕົກຕາດແຫ່ງນີ້ມີຄວາມງົດງາມກໍ່ຈິງແຕ່ເສັ້ນທາງເຂົ້າມາຫາສະຖານທີ່ແຫ່ງນີ້ແມ່ນຕ້ອງໄດ້ຍ່າງປະມານ 1 – 2 ຊົ່ວໂມງ ປັດຈຸບັນມີຜູ້ປະກອບການສາໍປະທານ ເພື່ອພັດທະນາເປັນແຫຼ່ງທ່ອງທ່ຽວທາງທໍາມະຊາດ ຈາກນັ້ນຜູ້ປະກອບການກໍ່ໄດ້ເອົາໃຈໃສ່ພັດທະນາປັບປຸງສະຖານທີ່ແຫ່ງນີ້ເປັນຕົ້ນແມ່ນຕັດເສັ້ນທາງເຂົ້າມາຫາຈຸດໃຈກາງຂອງນໍ້າຕົກຕາດທີ່ມີຄວາມຍາວ 3 ກິໂລແມັດ, ປັບປຸງສະຖານທີ່ບ່ອນຈອດລົດ, ຕັ້ງຕູບບໍລິການ 9 ຫຼັງ, ຫ້ອງນໍ້າ 2 ຫ້ອງ ແລະ ອໍານວຍຄວາມສະດວກໃຫ້ບັນດານັກທ່ອງທ່ຽວທັງພາຍໃນ ແລະ ຕ່າງປະເທດ.
ໂອກາດດ່ຽວກັນນີ້ ທ່ານ ສີວິໄລ ສີແສນດີ ກໍາມະການພັກແຂວງ ເລຂາພັກເມືອງ ຍັງໄດ້ຮຽກຮ້ອງມາຍັງຜູ້ປະກອບການປົກປັກຮັກສາສະພາບແວດລ້ອມ ເປັນຕົ້ນແມ່ນ: ຮັກສາປ່າໄມ້, ຮັກສາຄວາມສະອາດສະຖານທີ່ນໍ້າຕົກຕາດ, ຮັກສາຄວາມເປັນລະບຽບຮ້ອຍ ແລະ ຮັກສາຄວາມສະຫງົບປອດໄພ, ໃຫ້ອົງການປົກຄອງບ້ານ ຈະຫຼອດຮອດພໍ່ແມ່ປະຊາຊົນເປັນຜູ້ຊ່ວຍຊຸກຍູ້ໃຫ້ການກັບສະໜັບສະໜູນ, ອໍານວຍຄວາມສະດວກດ້ານຕ່າງໆໃຫ້ກັບຜູ້ປະກອບການທີ່ມີຄວາມຕ້ອງການຢາກມາລົງທືນພັດທະນາແຫຼ່ງທ່ອງທ່ຽວທີ່ຢູ່ພາຍໃນເມືອງພວກເຮົາໃຫ້ມີຄວາມໂດດເດັ່ນ ແລະ ເປັນສະຖານທີ່ທ່ອງທ່ຽວຂອງເມືອງໃຫ້ມີຄວາມຍືນຍົງຕະຫຼອດໄປ ຈາກນັ້ນໃນພິທີການນໍາພັກ-ລັດ ຂອງແຂວງ-ຂອງເມືອງໄດ້ພ້ອມກັນຕັດລີບີນ ແລະ ລັ້ນຄ້ອງ 9 ບາດ ເພຶ່ອເປັນສິລິມຸງຄົນ້ອມກັນນັ້ນຍັງໄດ້ຮັບຊົມການສະແດງສິນລະປະວັນນະຄະດີ.
ຂ່າວ: ອຸ່ນຄໍາ ຂັນວາລິດ
ແອດມິນ: ທອງຈັນ ວົງປັນຍາ
