ໃນວັນທີ 17 ກຸມພາ 2026, ສະຫາຍ ພົນຈັດຕະວາ ແກ້ວສຸວັນ ຜາງພິລາວົງ ຫົວໜ້າກົມໂຄສະນາອົບຮົມ ກົມໃຫ່ຍການເມືອງກອງທັບ, ໄດ້ເຄື່ອນໄຫວເຮັດວຽກ ຢູ່ກອງບັນຊາການທະຫານແຂວງບໍ່ແກ້ວ ໂດຍການຕ້ອນຮັບ ຂອງສະຫາຍ ພັນເອກ ອຳພັນ ໄຊຍາສຸບັດ ຫົວໜ້າການເມືອງ ກອງບັນຊາການທະຫານແຂວງບໍ່ແກ້ວ ພ້ອມດ້ວຍຄະນະ, ມີບັນດາ ພະແນກການທີ່ກ່ຽວຂ້ອງເຂົ້າຮ່ວມ.
ສະຫາຍ ພັນໂທ ບຸນຄໍ້າ ຄຳພັນ ຮອງຫົວໜ້າຫ້ອງການເມືອງ ກອງບັນຊາການທະຫານແຂວງບໍ່ແກ້ວ ໄດ້ສະຫຼຸບການຈັດຕັ້ງເຄື່ອນໄຫວວຽກງານໂຄສະນາອົບຮົມໂດຍຫຍໍ້ ໃນໄລຍະ 1 ປີຜ່ານມາ ໂດຍຍົກໃຫ້ເຫັນຜົນສໍາເລັດຫຼາຍດ້ານທີ່ພົ້ນເດັ່ນ ໄດ້ເອົາໃຈໃສ່ເຮັດວຽກງານສຶກສາອົບຮົມການເມືອງແນວຄິດໃຫ້ພະນັກງານນາຍ ແລະ ພົນທະຫານມີຄວາມອຸ່ນອ່ຽງທຸນທ່ຽງ ຜ່ານຜ່າຂໍ້ຫຍຸ້ງຍາກເພື່ອເຮັດສຳເລັດໜ້າທີ,ເປັນເຈົ້າການຊຸກຍູ້ສ້າງຂະບວນການຕ່າງໆ,ຕິດຕາມພິທີໂຄສະນາ-ປາຖະກະຖາສະແດງສິນລະປະວັນນະຄະດີເນື່ອງໃນໂອກາດວັນສຳຄັນຕ່າງໆຂອງຊາດ,ຂອງພັກ,ຂອງກອງທັບ, ແລະ ຂອງສາກົນ.ຄຽງຄູ່ກັນນັ້ນຍັງໄດ້ຈັດຕັ້ງປະຕິບັດວຽກງານ ຕິດຕາມເກັບກຳວິຊາສະເພາະ ຫາງສຽງສັງຄົມຂະຫຍາຍຕາໜ່າງຂ່າວສານ ສືມວນຊົນ,ລົງເຄື່ອນໄຫວຊຸກຍູ້ວຽກງານກໍ່ສ້າງນັກຮົບ ແລະ ກອງຮ້ອຍວັດທະນະທຳຢູ່ບັນດາກົມກອງເປົ້າໝາຍ.
ໂອກາດນີ້, ສະຫາຍ ພົນຈັດຕະວາ ແກ້ວສຸວັນ ຜາງພິລາວົງ ໄດ້ມີຄຳເຫັນຊີ້ນຳບັນຫາຕ່າງໆ. ເຊັ່ນ: ໃຫ້ສືບຕໍ່ເອົາໃຈໃສ່ປະຕິບັດຄໍາສັ່ງແນະນຳ ຂອງກົມໃຫຍ່ການເມືອງ ສະບັບເລກທີ 117/ກມທ, ລົງວັນທີ 6/1/2026 ກ່ຽວກັບການຝຶກອົບຮົມວຽກງານການເມືອງ-ແນວຄິດປະຈຳປີ 2026 ແລະ ວຽກງານອື່ນໆ ຕາມໜ້າທີ່ບົດບາດຂອງອົງການໆເມືອງ ກໍຄື ພະແນກໂຄສະນາອົບຮົມຮັບຜິດຊອບຄື: ວຽກຊຸກຍູ້ການສ້າງນັກຮົບ-ກົມກອງວັດທະນະທຳ, ວຽກໂຄສະນາປາຖະກະຖາວັນສຳຄັນ…, ວຽກສີລະປະວັນນະຄະດີສະໝັກຫລີ້ນ, ວຽກງານປະດັບປະດາຄ້າຍຄູ-ສຳນັກງານໃຫ້ສວຍງາມ, ວຽກງານສື່ມວນຊົນ, ຂ່າວສານ – ໂທລະໂຄ່ງ ແລະ ວຽກປີ່ນອ້ອມອື່ນໆໃຫ້ເປັນຂະບວນຟົດຟື້ນ, ແຂງແຮງຢ່າງຕໍ່ເນື່ອງ. ສະຫາຍກ່າວຢໍ້າຕື່ມວ່າ: ວຽກງານໂຄສະນາ ພວກເຮົາຕ້ອງມີຄວາມໜັກແໜ້ນທາງດ້ານການເມືອງ, ແນວຄິດ, ເຂັ້ມແຂງດ້ານການຈັດຕັ້ງ, ເຂົ້າໃຈແຈ້ງຕໍ່ແນວທາງນະໂຍບາຍຂອງພັກ-ລັດ ແລະ ກອງທັບ, ເພື່ອເປັນກະບອກສຽງອັນແຫຼມຄົມ ແລະ ໜ້າເຊື່ອຖືໃນການເຜີຍແຜ່ຂໍ້ມູນຂ່າວສານທີ່ຖືກຕ້ອງ,ຊັດເຈນ ແລະ ທ່ຽງທຳ.
ພາບ-ຂ່າວໂດຍ: ນີ່ ທຳມະວົງ.
