#ຢ່ານອນຫຼັບທັບສິດ ທັບສຽງ ຈົ່ງພ້ອມພຽງກັນໄປປ່ອນບັດເລືອກຕັ້ງ#
ວັນອາທິດ ທີ 22 ກຸມພາ 2026 ນີ້ ເປັນວັນເລືອກຕັ້ງສະມາຊິກ ສະພາແຫ່ງຊາດຊຸດທີ X ແລະ ສະມາຊິກສະພາປະຊາຊົນຂັ້ນແຂວງຊຸດທີ V, ສະນັ້ນ, ເພື່ອເຮັດໃຫ້ການປ່ອນບັດດຳເນີນໄປຢ່າງຖືກ ຕ້ອງຕາມລະບຽບການກຳນົດໄວ້ ເຮົາລອງມາຮຽນຮູ້ເຖິງລະບຽບການປ່ອນບັດເລືອກຕັ້ງແມ່ນມັນມີລະບຽບການຄືແນວໃດແທ້ ເພາະນີ້ເປັນສິ່ງໜຶ່ງທີ່ສຳຄັນທີ່ຈະເຮັດໃຫ້ການປ່ອນບັດເລືອກຕັ້ງດຳເນີນໄປຢ່າງຖືກຕ້ອງ ແລະ ມີປະສິດຕິຜົນ ແລ້ວ ລະບຽບການເລືອກຕັ້ງມີແນວໃດ? ເພື່ອຄວາມກະຈ່າງແຈ້ງຕື່ມອີກ ທິດດີ ຈຶ່ງຂໍນຳສະເໜີບາງຂໍ້ມູນໃຫ້ເພື່ອນໄດ້ຮັບຮູ້ນຳກັນ.
ຖ້າເວົ້າເຖິງລະບຽບການເລືອກຕັ້ງແລ້ວປະກອມີຫຼາຍຢ່າງຢູ່ຮ່ວມກັນເຊັ່ນ: ສະຖານທີ່ປ່ອນບັດເລືອກຕັ້ງ ເພິ່ນໄດ້ຈັດໃສ່ບ່ອນທີ່ເຫັນວ່າເໝາະສົມ, ສະດວກດີ ແລະ ມີຄວາມປອດໄພເຊັ່ນ ໂຮງຮຽນ, ສະໂມ ສອນ, ວັດ ຫຼື ສະຖານທີ່ອື່ນ ໂດຍຈັດເປັນຫ້ອງສະເພາະ ເພື່ອໃຫ້ຜູ້ປ່ອນບັດ ຂີດບັດລົງຄະແນນສຽງເລືອກຕັ້ງ,ໃນແຕ່ລະໜ່ວຍເລືອກຕັ້ງ ແມ່ນຈະມີສອງຫີບປ່ອນບັດຄື ຫີບປ່ອນບັດສະມາຊິກສະພາແຫ່ງຊາດ ແລະ ຫີບປ່ອນບັດ ສະມາຊິກສະພາປະຊາຊົນຂັ້ນແຂວງ; ເວລາຈະປ່ອນບັດເລືອກຕັ້ງນັ້ນ ຄະນະຮັບຜິດຊອບໜ່ວຍປ່ອນບັດເລືອກຕັ້ງຈະໄດ້ແນະນຳ, ເຜີຍແຜ່ ລະບຽບການຕ່າງໆ, ວິທີຂີດບັດ ແລະ ວິທີປ່ອນບັດລົງຄະແນນສຽງ ໃຫ້ຜູ້ມີສິດເລືອກຕັ້ງທຸກຄົນເຂົ້າໃຈເສຍກ່ອນ; ທຸກຫີບບັດຕ້ອງໄຂຫີບບັດໃຫ້ເຫັນທາງໃນວ່າບໍ່ມີສິ່ງອື່ນໃດແອບແຝງມານຳ ໂດຍຊ້ອງໜ້າຜູ້ມີສິດເລືອກຕັ້ງກ່ອນປ່ອນບັດ;ນອກຈາກນັ້ນແລ້ວ ຜູ້ມີສິດເລືອກຕັ້ງ ຕ້ອງສະເໜີຕົວ ແລະ ແຈ້ງບັດຢັ້ງຢືນຕໍ່ຄະນະຮັບຜິດຊອບໜ່ວຍປ່ອນບັດເລືອກຕັ້ງເພື່ອຮັບເອົາບັດລົງຄະແນນສຽງ ທັງສອງຫີບບັດ.
ແລ້ວມີຫຼາຍທ່ານອາດຕັ້ງຄຳຖາມວ່າ ຜູ້ມີສິດເລືອກຕັ້ງ ທີ່ບໍ່ຮູ້ໜັງສື ຊຶ່ງບໍ່ສາມາດຂີດບັດດ້ວຍຕົນເອງນັ້ນເດຈະເຮັດແນວໃດ? ບັນຫານີ້ ຄະນະຮັບຜິດຊອບໜ່ວຍປ່ອນບັດເລືອກຕັ້ງ ແມ່ນມີສິດແຕ່ງຕັ້ງຜູ້ຮັບຜິດຊອບຊ່ວຍຂີດບັດໃຫ້, ແຕ່ການຂີດບັດນັ້ນຕ້ອງປະຕິບັດຕາມຄວາມມັກ, ການຊີ້ບອກຂອງຜູ້ມີສິດເລືອກຕັ້ງນັ້ນ ແລະ ໃຫ້ຜູ້ກ່ຽວນຳເອົາບັດລົງຄະແນນສຽງໄປປ່ອນໃສ່ແຕ່ລະຫີບບັດດ້ວຍຕົນເອງ, ຫາກໃນກໍລະນີປ່ອນບັດດ້ວຍຕົນເອງບໍ່ໄດ້ ກໍມອບໃຫ້ຄະນະຮັບຜິດຊອບໜ່ວຍປ່ອນບັດເລືອກຕັ້ງຜູ້ໃດຜູ້ໜຶ່ງໜຶ່ງຊ່ວຍນຳ ເອົາບັດໄປປ່ອນໃສ່ແຕ່ລະຫີບບັດ ໂດຍຊ້ອງໜ້າຜູ້ກ່ຽວ.
ໃນກໍລະນີ ຫາກຜູ້ມີສິດເລືອກຕັ້ງເຈັບປ່ວຍ, ເສຍອົງຄະ, ເຖົ້າແກ່ໄປປ່ອນບັດບໍ່ໄດ້ນັ້ນ ທາງຄະນະຮັບຜິດຊອບໜ່ວຍປ່ອນບັດເລືອກຕັ້ງ ເພິ່ນຈະຈັດໜ່ວຍຮັບຜິດຊອບຫີບບັດເຄື່ອນທີ່ໄປຮັບເອົາບັດລົງຄະແນນສຽງກັບທີ່ເລີຍ; ໃນເວລາທີ່ຜູ້ມີສິດເລືອກຕັ້ງຫາກຂີດບັດຜິດ ກໍຕ້ອງສົ່ງບັດທີ່ຂີດຜິດນັ້ນຄືນ ໃຫ້ຄະນະຮັບຜິດຊອບ ແລ້ວຂໍເອົາບັດໃໝ່ນຳຄະນະຮັບຜິດຊອບໜ່ວຍປ່ອນບັດເລືອກຕັ້ງແລ້ວມາຂີດຄືນໃໝ່ ແລະ ໃນເວລາປ່ອນບັດນັ້ນຜູ້ມີສິດເລືອກຕັ້ງ ຕ້ອງປ່ອນບັດລົງຄະແນນສຽງ ໃສ່ແຕ່ລະຫີບບັດ ເທື່ອລະຄົນ.
ການປ່ອນບັດເລືອກຕັ້ງ ເອົາສະມາຊິກສະພາແຫ່ງຊາດຊຸດທີ X ແລະ ສະມາຊິກສະພາປະຊາຊົນຂັ້ນແຂວງຊຸດທີ V ແມ່ນພັນທະພື້ນຖານຂອງພົນລະເມືອງລາວໃນການໃຊ້ສິດປະຊາທິປະໄຕຂອງຕົນເອງຢ່າງເຕັມສ່ວນ ເພື່ອເລືອກໃຫ້ໄດ້ບຸກຄົນທີ່ມີຄວາມຮູ້ ຄວາມສາມາດ ເກີນຜູ້ອື່ນເຂົ້າໄປເປັນຕົວແທນຂອງຕົນໃນສະພາ, ສ່ວນໃນພາກປະຕິບັດຕົວຈິງນັ້ນ ເພິ່ນກໍມີຄະນະກຳມະການ ຄອຍແນະນຳຢູ່ໜ້າພິທີ, ອັນໃດບໍ່ເຂົ້າໃຈກໍສາມາດສອບຖາມໄດ້ ສຳຄັນແມ່ນພ້ອມກັນໄປໃຊ້ສິດຢ່າງພ້ອມພຽງ ຫຼີກເວັ້ນບໍ່ໃຫ້ມີບັດເສຍ. ການໄປໃຊ້ສິດເລືອກຕັ້ງໃນຄັ້ງນີ້ ແມ່ນກຽດສັກສີໃນຖານະເປັນພົນລະເມືອງລາວ, ສະນັ້ນ ຢ່ານອນຫຼັບທັບສິດທັບສຽງ ຈົ່ງພ້ອມກັນໄປໃຊ້ສິດເລືອກຕັ້ງໃຫ້ໄດ້ຮ້ອຍສ່ວນຮ້ອຍ.
ແອດມິນ: ທອງຈັນ ວົງປັນຍາ. ຄະນະໂຄສະນາອົບຮົມແຂວງ.
