📌ກອງປະຊຸມດັ່ງກ່າວໄດ້ຈັດຂຶ້ນ ໃນວັນທີ 17-18 ກັນຍາ 2026ນີ້ ທີ່ແຂວງດຽນບຽນຝູ ສສ ຫວຽດນາມ. ໃນກອງປະຊຸມ ໂດຍມີຜູ້ແທນຈາກ 6 ແຂວງພາກເໜືອ ຂອງລາວ ແລະແຂວງບໍ່ແກ້ວກໍແມ່ນໜຶ່ງໃນນັ້ນທີ່ໄດ້ເຂົ້າຮ່ວມ ເພື່ອທົບທວນຄືນການຮ່ວມມື ລະຫວ່າງ ພະແນກອຸດສາຫະກຳ ແລະ ການຄ້າ 6ແຂວງພາກເໜືຶອ ຂອງລາວ ກັບພະແນກອຸດສາຫະກຳ ແລະ ການຄ້າ ແຂວງດຽນບຽນ ສສ ຫວຽດນາມ ໂດຍໄດ້ເນັ້ນໃສ່ການຮ່າງຍຸດທະສາດໃໝ່ໃນການເຊື່ອມໂຍງເສດຖະກິດຊາຍແດນ ລະຫວ່າງ ຫວຽດນາມ, ລາວ ແລະ ຈີນ. ກອງປະຊຸມຄັ້ງນີ້ໄດ້ຊີ້ໃຫ້ເຖິງ “ການຫັນເປັນດິຈິຕອນ” ແລະ “ການຄ້າສີຂຽວ” ຈະກາຍເປັນກຳລັງຂັບເຄື່ອນບຸກທະລຸ ທີ່ຈະຊ່ວຍເພີ່ມມູນຄ່າການຄ້າຂ້າມຊາຍແດນໃນອະນາຄົດ. ໃນນັ້ນ, 3 ທິດທາງບຸກທະລຸທີ່ສຳຄັນ ຄື:
ການຫັນເປັນດິຈິຕອນຢູ່ດ່ານຊາຍແດນ: ເພື່ອເລັ່ງໃສ່ການນຳໃຊ້ລະບົບດ່ານພາສີອັດສະລິຍະ (Smart Customs), ການເຊື່ອມໂຍງຂໍ້ມູນແບບເອເລັກໂຕຣນິກ ແລະ ເອກະສານການຄ້າດິຈິຕອນ ເພື່ອຫຼຸດຜ່ອນເວລາໃນການແຈ້ງບອກສິນຄ້າ, ຫຼຸດຄ່າໃຊ້ຈ່າຍດ້ານໂລຈິສຕິກ, ແລະ ເພີ່ມຄວາມໂປ່ງໃສໃນການຂົນສົ່ງ.
ການສົ່ງເສີມການຄ້າສີຂຽວ: ສຸມໃສ່ການຍົກກະດັບມາດຕະຖານສິນຄ້າກະສິກຳ ແລະ ເຮັດໃຫ້ການຂົນສົ່ງເປັນມິດກັບສິ່ງແວດລ້ອມ. ການກຳນົດມາດຕະຖານການຜະ ລິດແບບຍືນຍົງຈະຊ່ວຍໃຫ້ສິນຄ້າສາມາດເຈາະຕະຫຼາດ ໄດ້ງ່າຍຂຶ້ນ ແລະ ມີມູນຄ່າເພີ່ມສູງກວ່າເກົ່າ.
ການເຊື່ອມໂຍງໂລຈິສຕິກແລະໂຄງຮ່າງພື້ນຖານ: ຍົກລະດັບການປະສານງານຕາມແລວທາງເສດຖະກິດພາກເໜືອ ໂດຍສະເພາະການເຊື່ອມຕໍ່ເສັ້ນທາງລົດໄຟ ລາວ-ຈີນ ແລະ ເສັ້ນທາງບົກສູ່ນະຄອນ ແລະ ແຂວງຊາຍແດນຂອງຫວຽດນາມ ເພື່ອສ້າງເປັນຕາໜ່າງການຂົນສົ່ງສິນຄ້າແບບຄົບວົງຈອນ.
📌ພ້ອມດຽວກັນນັ້ນ ຜູ້ແທນທີ່ເຂົ້າຮ່ວມກອງປະຊຸມໄດ້ແລກປ່ຽນຢ່າງກົງໄປກົງມາເພື່ອການຮ່ວມມື ຫວຽດນາມ – ລາວ – ຈີນ ໃນການນຳໃຊ້ເຕັກໂນໂລຊີທີ່ທັນສະໄໝ ແລະ ການດຳເນີນທຸລະກິດແບບຍືນຍົງ ບໍ່ພຽງແຕ່ຈະຊ່ວຍຟື້ນຟູ ແລະ ຂະຫຍາຍຕົວເລກການນຳເຂົ້າ-ສົ່ງອອກ ຢູ່ເຂດພາກເໜືອເທົ່ານັ້ນ, ແຕ່ຍັງເປັນການສ້າງຮາກຖານເສດຖະກິດຊາຍແດນໃຫ້ເຂັ້ມແຂງ ແລະ ຍືນຍົງໃນໄລຍະຍາວອີກດ້ວຍ
ຂ່າວ: ຈ.ຈັນທະລິດ
ພາບ: ຫ້ອງການຕົວແທນອຸດສາຫະກຳ ແລະ ການຄ້າດຽນບຽນ ປະຈຳແຂວງບໍ່ແກ້ວ