ສະຫາຍ ພົນເອກ ວິໄລ ຫຼ້າຄຳຟອງ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ
ສະຫາຍ ພົນຈັດຕະວາ ແປ້ນຄຳ ບຸດຈັນແພງ ເລຂາພັກແຂວງ ຮັກສາການເຈົ້າແຂວງບໍ່ແກ້ວ
ສະຫາຍ ຈອມສີ ລັດຕະນະປັນ ຮອງເລຂາພັກແຂວງ ປະທານສະພາປະຊາຊົນແຂວງບໍ່ແກ້ວ
ສະຫາຍ ສຸກຄຳເພັດ ເຮືອງບຸດດີ ຮອງປະທານ ຄະນະກວດກາສູນກາພັກ
ກອງປະຊຸມທາບທາມບຸກຄະລາກອນເຂົ້າໂຄງປະກອບກອງປະຊຸມໃຫຍ່ອົງຄະນະພັກແຂວງບໍ່ແກ້ວ ສະໄໝທີ VII ຮອບ 3 ເຊິ່ງເປັນຮອບສຸດທ້າຍ ໄດ້ຈັດຂຶ້ນວັນທີ 24 ກັນຍາ 2025ນີ້ ທີ່ສະໂມສອນໃຫຍ່ຂອງແຂວງໂດຍການເປັນປະທານຂອງ ສະຫາຍ ພົນຈັດຕະວາ ແປ້ນຄຳ ບຸດຈັນແພງ ເລຂາພັກແຂວງ ຮັກສາການເຈົ້າແຂວງບໍ່ແກ້ວ, ເປັນກຽດເຂົ້າຮ່ວມມີ ສະຫາຍ ພົນເອກ ວິໄລ ຫຼ້າຄຳຟອງ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ, ສະຫາຍ ສຸກຄຳເພັດ ເຮືອງບຸດດີ ຮອງປະທານ ຄະນະກວດກາສູນກາພັກ, ມີບັນດາຄະນະປະຈຳພັກແຂວງ, ກຳມະການພັກແຂວງ, ເລຂາ-ຮອງເລຂາພັກເມືອງ 5 ເມືອງ, ເລຂາ-ຮອງເລຂາຄະນະພັກຮາກຖານ, ເລຂາ-ຮອງເລຂາໜ່ວຍພັກ ແລະ ຜູ້ແທນກອງປະຊຸມເຂົ້າຮ່ວມ.
ກອງປະຊຸມສະຫາຍ ພົນຈັດຕະວາ ແປ້ນຄຳ ບຸດຈັນແພງ ປະທານກອງປະຊຸມໄດ້ມີເຫັນວ່າ: ກອງປະຊຸມທາບທາມບຸກຄະລາກອນ ໃນຮອບ III ແມ່ນມີຄວາມສໍາຄັນຫຼາຍ ຈຶ່ງໄດ້ຮຽກຮ້ອງບັນດາຜູ້ແທນຈົ່ງສຸມສະຕິ ແລະ ໃຊ້ປະຊາທິປະໄຕຂອງຕົນເລືອກເຟັ້ນເອົາບຸກຄະລາກອນຜູ້ທີ່ມີມາດຖານເງື່ອນໄຂຄົບຖ້ວນ ເຂົ້າໃນໂຄງປະກອບກອງປະຊຸມໃຫຍ່ອົງຄະນະພັກແຂວງ ສະໄໝທີVII ທີ່ຄົບຕາມມາດຖານທີ່ຄະນະກຳມະ ການບຸກຄະລາກອນກອງປະຊຸມໃຫຍ່ໄດ້ກຳນົດໄວ້, ເພື່ອບັນຈຸບຸກຄະລາກອນເຂົ້າໂຄງປະກອບໃຫ້ຄົບຊຸດ. ຈາກນັ້ນ ສະຫາຍ ຈອມສີ ລັດຕະນະປັນ ຮອງເລຂາພັກແຂວງ ປະທານສະພາປະຊາຊົນແຂວງບໍ່ແກ້ວ ໄດ້ຜ່ານບົດສຳຫຼວດການນຳພາລວມຍົກໃຫ້ເຫັນດ້ານດີຜົນງານ, ດ້ານອ່ອນຂໍ້ຄົງຄ້າງທີ່ຈະໄດ້ສືບຕໍ່ແກ້ໄຂໃນຕໍ່ໜ້າ. ໃນການນຳພາ-ຊີ້ນຳຕະຫຼອດໃນໄລຍະ 5 ປີ ຜ່ານມາ. ຄະນະບໍລິຫານງານພັກແຂວງແມ່ນມີຄວາມຮັບຜິດຊອບສູງໃນການຊີ້ນຳ ແລະ ນຳພາຢ່າງຕັ້ງໜ້າ ເຮັດໃຫ້ແຂວງບໍ່ແກ້ວມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບ, ຊີວິດການເປັນຢູ່ຂອງປະຊາຊົນດີຂຶ້ນເທື່ອລະກ້າວ. ເຊິ່ງໄດ້ສະແດງອອກໃນແຕ່ລະດ້ານເປັນຕົ້ນແມ່ນດ້ານການເມືອງນຳພາແນວຄິດດ້ານການຈັດຕັ້ງ-ປັບປຸງແບບແຜນນຳພາ ແລະ ວິທີການເຮັດວຽກຢ່າງມີຄວາມຮັບຜິດຊອບສູງ, ເສດຖະກິດມີການຂະຫຍາຍຕົວໃນລະດັບ 4,5% ການກໍ່ສ້າງພື້ນຖານໂຄງລາງການຜະລິດ, ການບໍລິການ, ການທ່ອງ ທ່ຽວມີທ່າອ່ຽງດີຂຶ້ນ, ສຳຫຼັບຄາດໝາຍສູ້ຊົນໃນຕໍ່ໜ້າແມ່ນມີ 7 ແຜນວຽກຈຸດສຸມທີ່ຈະໄດ້ເພີ່ມຄວາມເອົາໃຈໃສ່ແກ້ໄຂໃຫ້ສຳເລັດຢ່າງຕັ້ງໜ້າ. ພ້ອມນັ້ນ ສະຫາຍ ສຸກຄຳເພັດ ເຮືອງບຸດດີ ຮອງປະທານ ຄະນະກວດກາສູນກາງພັກ ໄດ້ຜ່ານມາດຖານເງື່ອນໄຂຂອງຜູ້ລົງສະມັກເລືອກຕັ້ງເຂົ້າເປັນຄະນະບໍລິຫານງານພັກ ແຂວງບໍ່ແກ້ວຊຸດໃໝ່. ມາດຖານຕ້ອງມີທັດສະນະຫຼັກໝັ້ນທາງດ້ານການເມືອງໜັກແໜ້ນ, ມີຄວາມຊື່ສັດບໍລິສຸດ, ມີຄວາມຈົ່ງຮັກພັກດີຕໍ່ພັກຕໍ່ການຈັດຕັ້ງ, ຕໍ່ປະຊາຊົນ, ເຮັດວຽກງານເປັນໝູ່ຄະນະ, ມີແບບແຜນການດຳລົງຊີວິດທີ່ປອດໃສ, ບໍ່ສວຍໃຊ້ຖານະຕຳແໜ່ງໜ້າທີ ເພື່ອຜົນປະໂຫຍດສ່ວນຕົວ, ຈຸ້ມເຈື້ອເຊື້ອສາຍພັກພວກ, ຕ້ອງເປັນຜູ້ທີ່ມີອຸດົມການຕໍ່ແນວທາງການປ່ຽນແປງໃໝ່ຢ່າງຮອບດ້ານຂອງພັກຢ່າງແທ້ຈິງ. ເພື່ອນຳພາປະເທດຊາດໃຫ້ຫຼຸດພົ້ນອອກຈາກການດ້ອຍພັດທະນາ ກໍ່ຄືການພັດທະນາແຂວງບໍ່ແກ້ວໃຫ້ມີຄວາມຈະເລີນຮຸ່ງເຮື່ອງສີວິໄລໃນອານາຄົດ.
ໂອກາດນີ້ ສະຫາຍ ພົນເອກ ວິໄລ ຫຼ້າຄຳຟອງ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ ໄດ້ມີຄຳເຫັນຊີ້ນຳກອງປະຊຸມວ່າ: ການດຳເນີນກອງປະຊຸມທາບທາມບຸກຄະລາກອນໃນຮອບ III ນີ້ແມ່ນເລືອກເອົາຜູ້ທີ່ມີຄວາມຮູ້ຄວາມສາມາດ ເພື່ອບັນຈຸເຂົ້າໂຄງປະກອບກອງປະຊຸມໃຫຍ່ອົງຄະນະພັກແຂວງບໍ່ແກ້ວ ສະໄໝທີVII ນີ້ໃຫ້ ຄົບຊຸດ, ສຳຫຼັບມາດຖານເງື່ອນໄຂຜູ້ທີ່ສະມັກເປັນຄະນະບໍລິຫານງານພັກແຂວງບໍ່ແກ້ວ ຕ້ອງມີຜູ້ເກົ່າຜູ້ໃໝ່ລົງສະມັກ, ຕ້ອງຮັບປະກັນ 3 ຮຸ່ນ ( ອາວຸໂສ, ກາງ, ໜຸ່ມ ) ມີເພດ, ມີຊົນເຜົ່າເຂົ້າໃນໂຄງປະກອບຕາມເງື່ອນ ໄຂຕົວຈິງ, ແນ່ໃສ່ຮັບປະກັນລັກນະສືບທອດປ່ຽນແທນຢ່າງຕໍ່ເນື່ອງ.
ຂ່າວ: ບຸນຈັນ ມະນີໄຊ.
ກວດແກ້: ມະນິດ ແກ້ວວົງເພັດ.
ແອກມິນ: ທອງຈັນ ວົງປັນຍາ.
