ຕອນເຊົ້າຂອງວັນທີ 25 ກຸມພາ 2026 ນີ້ ທີ່ຫໍວັດທະນະທຳແຂວງບໍ່ແກ້ວ ໄດ້ພິທີເພື່ອຮັບຊົມການຖ່າຍທອດສົດຈາກນະຄອນຫຼວງວຽງຈັນແບບທາງໄກ ຂອງກອງປະ ຊຸມເຜີຍແຜ່ ແລະ ເຊື່ອມຊືມເອກະສານກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກປະຊາຊົນປະຕິວັດລາວ. ສຳຫຼັບແຂວງບໍ່ແກ້ວເຂົ້າຮ່ວມໃນພິທີຄັ້ງນີ້ມີ ສະຫາຍ ພົນຈັດຕະວາ ແປ້ນຄຳ ບຸດຈັນແພງ ກໍາມະການສູນກາງພັກ ເລຂາຄະນະບໍລິ ຫານງານພັກແຂວງບໍ່ແກ້ວ, ສະຫາຍ ພົນຈັດຕະວາ ສຸກພະຈັນ ສີລາເພັດ ຮອງເລຂາພັກແຂວງ ປະທານຄະ ນະກຳມະການປົກຄອງແຂວງ, ມີບັນດາຄະນະປະຈຳພັກແຂວງ, ກຳມະການພັກແຂວງ, ຫົວໜ້າ-ຮອງຫົວ ໜ້າພະແນກການ, ພະນັກ ງານສະມາຊິກພັກຫຼັກແຫຼ່ງອ້ອມຂ້າງແຂວງເຂົ້າຮ່ວມ.
ໃນພິທີອັນສະຫງ່າລາສີທີ່ຊົງກຽດນີ້, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ ໄດ້ເນັ້ນໜັກເຖິ່ງຄວາມໝາຍຄວາມສຳຄັນຂອງກອງປະ ຊຸມ ເຊິ່ງຖືເປັນການເປີດສາກໃຫ້ແກ່ການເລີ່ມຕົ້ນຜັນຂະຫຍາຍມະຕິກອງປະຊຸມໃຫຍ່ຄັ້ງທີ XII ຂອງພັກ. ໂດຍສະຫາຍໄດ້ກຳ ນົດຈຸດປະສົງອັນເປັນເຂັມທິດເຍືອງທາງ 5 ຂໍ້ທີ່ສຳຄັນຄື: ໜຶ່ງ: ສ້າງຄວາມຮັບຮູ້, ເຂົ້າ ໃຈທີ່ເລິກເຊິ່ງຕໍ່ເນື້ອໃນຈິດໃຈສໍາຄັນຂອງແນວທາງການເມືອງ ແລະ ແນວທາງ ການຈັດຕັ້ງທີ່ໄດ້ກຳນົດອອກໃນກອງປະຊຸມໃຫຍ່ ຄັ້ງທີ XII ຂອງພັກຢ່າງເປັນລະບົບ; ສອງ: ເຊື່ອມຊຶມ, ກຳແໜ້ນເນື້ອໃນທີ່ຈະໄດ້ ນໍາພາຊີ້ນໍາການຜັນຂະຫຍາຍ ແລະ ຈັດ ຕັ້ງປະຕິບັດຕົວຈິງ; ສາມ: ສ້າງໃຫ້ໄດ້ແຜນດໍາເນີນງານ, ແຜນປະຕິ ບັດງານລະອຽດຂອງແຕ່ລະຂະແໜງການ-ທ້ອງຖິ່ນ ທີ່ໄດ້ກຳນົດໜ້າວຽກຢ່າງລະອຽດໂດຍສະເພາະແມ່ນແຜນຄົນ, ແຜນເງິນ, ຄວາມຮັບຜິດຊອບ, ກໍານົດເວລາຊັດເຈນ, ແທດຕົວຈິງ ແລະ ສາມາດຈັດຕັ້ງປະຕິບັດໃຫ້ມີຜົນສໍາເລັດເປັນຮູບປະທຳ; ສີ່: ມີກົນໄກ, ລະບອບແບບແຜນການຊີ້ນໍາ, ບັນຊາ, ຕິດຕາມ, ກວດກາການຊຸກຍູ້ຈັດຕັ້ງປະຕິບັດທີ່ຖືກ ຕ້ອງ, ແທດເຖິ່ງ ແລະ ມີວິທະຍາສາດ; ຫ້າ: ມີຄວາມເປັນເອກະພາບສູງຢູ່ພາຍໃນ, ມີຄວາມຕັດສິນໃຈອັນເດັດດ່ຽວ, ກ້າຫານ, ປະດິດສ້າງ ເພື່ອຜັນຂະຫຍາຍ ແລະ ຈັດ ຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XII ຂອງພັກ ເຂົ້າສູ່ລວງເລິກ ແລະ ເປັນຮູບປະທຳ. ກອງປະຊຸມຍັງໄດ້ຮັບຟັງການສະເໜີໂດຍສັງລວມກ່ຽວກັບເນື້ອໃນສໍາຄັນຂອງໂຄງການການເມືອງ, ລາຍງານການເມືອງທີ່ໄດ້ລາຍງານ ແລະ ຮັບຮອງເອົາໃນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີXII ຂອງພັກ, ການຜັນຂະຫຍາຍແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X ໂດຍກຳນົດເປັນໂຄງການລະອຽດ ເພື່ອຈັດຕັ້ງປະຕິ ບັດໃນແຕ່ລະປີ, ນອກຈາກນັ້ນ ສະຫາຍເລຂາທິການໃຫຍ່ ຍັງໄດ້ເນັ້ນຕື່ມວ່າ: ການເຜີຍແຜ່, ເຊື່ອມຊຶມເອກະສານ ກອງປະຊຸມໃຫຍ່ໃນຄັ້ງນີ້ ແມ່ນການສືບຕໍ່ບຸກທະລຸທາງດ້ານຈິນຕະນາການ, ຍົກສູງຫຼັກໝັ້ນການເມືອງໃຫ້ມີຄວາມເດັດດ່ຽວໜຽວແໜ້ນ, ບໍ່ຫວັ່ນໄຫວຄອນແຄນຕໍ່ສະພາບການຕ່າງໆ, ຕ້ານ ແລະ ແກ້ໄຂທັດສະນະຜິດເຂ່ວຕ່າງໆ, ລັດທິຄຳພີກົນຈັກ, ຮັກສາໄດ້ຄວາມສາມັກຄີເປັນເອກະພາບພາຍໃນພັກ ແລະ ພາຍໃນສັງຄົມໃຫ້ມີຄວາມໜັກແໜ້ນຍິ່ງຂຶ້ນ. ພ້ອມກັນຍູ້ແຮງຜັນຂະຫຍາຍ ແລະ ຈັດຕັ້ງປະຕິບັດຕົວຈິງ, ເຮັດໃຫ້ກາຍເປັນຂະ ບວນການອັນກວ້າງຂວາງຂອງມະຫາຊົນທົ່ວສັງຄົມ ເພື່ອນໍາເອົາຜົນປະໂຫຍດຕົວຈິງມາໃຫ້ປະເທດຊາດ ແລະ ປະຊາຊົນ, ເຮັດໃຫ້ປະເທດຊາດໄດ້ຮັບການພັດທະນາຢ່າງຖືກຕ້ອງຕາມທິດສັງຄົມນິຍົມຢ່າງໜັກແໜ້ນ, ພ້ອມທັງໄດ້ຮຽກຮ້ອງໃຫ້ບັນດາສະຫາຍການນຳພັກ-ລັດ ນັບແຕ່ສູນກາງເຖິ່ງທ້ອງຖິ່ນ ຈົ່ງຍົກສູງຄວາມຮັບຜິດ ຊອບໜ້າທີ່ການເມືອງຂອງຕົນ, ນຳເອົາເນື້ອໃນຈິດໃຈຂອງກອງປະຊຸມ ໃຫຍ່ຄັ້ງທີ XII ຂອງພັກ ນຳໄປຈັດຕັ້ງປະຕິບັດໃຫ້ເປັນຮູບປະທຳ. ເພື່ອເຮັດໃຫ້ໂຄງການການເມືອງຂອງພັກ ໄດ້ຮັບການຈັດຕັ້ງຜັນຂະຫຍາຍສູ່ລວງເລິກ ພັກເຮົາສືບຕໍ່ຍຶດໝັ້ນຢ່າງສະເໝີຕົ້ນສະເໝີປາຍ ບັນດາຫຼັກການ ແລະ ທັດສະນະພື້ນຖານໃນການຍູ້ແຮງ ການຈັດຕັ້ງປະຕິບັດແນວທາງປ່ຽນແປງໃໝ່ ຂອງພັກເຮົາຢ່າງຮອບດ້ານ.
ພາບ-ຂ່າວ: ບຸນຈັນ ມະນີໄຊ ວັນທີ 25 ກຸມພາ 2026.
ແອັດມິນ: ທອງຈັນ ວົງປັນຍາ.
