ແຂວງບໍ່ແກ້ວຈັດງານສັບປະດາແຫ່ງຊາດດ້ານຄວາມປອດໄພທາງຫຼວງ ປະຈໍາປີ 2026 ພາຍໃຕ້ຫົວຂໍ້: ດື່ມຢ່າງມີສະຕິ, ເມົາບໍ່ຂັບລົດ ພິທີໄດ້ຂຶ້ນໃນຕອນເຊົ້າຂອງວັນທີ 4 ເມສາ 2026ນີ້ ທີ່ສະໂມສອນແຂວງ, ເປັນກຽດເຂົ້າຮ່ວມມີທ່ານ ພົ.ຈວ ສຸກພະຈັນ ສີລາເພັດ ຮອງເລຂາພັກແຂວງ ປະທານຄະນະກຳມະ ການປົກຄອງແຂວງ, ມີບັນດາການນຳຂອງແຂວງ-ເມືອງ, ຫົວໜ້າ-ຮອງຫົວໜ້າພະແນກການ, ສອງກອງບັນຊາການທະຫານ-ຕຳຫຼວດ, ໂຮງຮຽນ, ໂຮງໝໍ, ບໍລິສັດ ລັດວິສາຫະກິດ ຕະ ຫຼອດຮອດພະນັກງານ ແລະ ນັກຮຽນເຂົ້າຮ່ວມເປັນຂະບວນການຝົດຟື້້ນ.
ທ່ານ ຄໍາແສງ ສຸລິຍະວົງ ຄະນະປະຈຳພັກແຂວງ ຮອງປະທານຄະນະກຳມະການປົກຄອງແຂວງບໍ່ແກ້ວ, ປະທານຄະນະກໍາມະການແຫ່ງຊາດດ້ານຄວາມປອດໄພທາງຫຼວງຂັ້ນແຂວງ ໄດ້ມີຄຳເຫັນວ່າ: ການຈັດງານໃນມື້ນີ້ ເພື່ອຢັ້ງຢືນເຖິ່ງຄວາມເປັນຫ່ວງເປັນໄຍ, ຄວາມເອົາໃຈໃສ່ ແລະ ຄວາມຮັບຜິດຊອບຂອງລັດຖະບານກໍ່ຄືບັນດາແຂວງຕໍ່ວຽກງານຄວາມປອດໄພທາງຫຼວງ ແລະ ທັງເປັນການຈັດຕັ້ງປະຕິບັດກົດ ໝາຍວ່າດ້ວຍການຈະລາຈອນທາງບົກ, ຍຸດທະສາດແຫ່ງຊາດດ້ານຄວາມປອດໄພທາງຫຼວງ ແລະ ມະຕິຂອງອົງການສະຫະປະຊາຊາດ ກ່ຽວກັບການປັບປຸງຄວາມປອດໄພທາງຫຼວງໃນທົ່ວໂລກ, ແນ່ໃສ່ເພື່ອໂຄສະນາ, ສ້າງສະຕິ ແລະ ປູກຈິດສໍານຶກໃຫ້ປະ ຊາຊົນທຸກຊັ້ນຄົນທົ່ວສັງຄົມ ເຫັນໄດ້ເຖິ່ງໄພອັນຕະລາຍຂອງການລະເມີດກົດຈະລາຈອນເປັນຕົ້ນແມ່ນການຂັບຂີ່ລົດໄວ, ການດື່ມສິ່ງມຶນເມົາແລ້ວຂັບຊຶ່ງເປັນສາເຫດສ່ວນໃຫຍ່ໃນການເກີດ ອຸປະຕິເຫດ, ເຫັນໄດ້ຜົນກະທົບຂອງການເກີດອຸປະຕິເຫດ ແລະ ສົ່ງຜົນສະທ້ອນຕໍ່ການດໍາລົງຊີວິດຂອງຄົນ ໃນສັງຄົມ, ຕໍ່ເສດຖະກິດ ແລະ ການພັດທະນາຂອງຊາດ. ທ່ານຍັງໄດ້ຮຽກຮ້ອງມາຍັງທຸກພາກສ່ວນໃນທົ່ວສັງຄົມ ຈົ່ງໄດ້ພ້ອມກັນຮ່ວມແຮງຮ່ວມໃຈປະຕິບັດກົດຈະລາຈອນຢ່າງເຂັ້ມງວດ ແລະ ໂຄ ສະນາປູກຈິດສໍານຶກກ່ຽວກັບວຽກງານຄວາມປອດໄພທາງຫຼວງໃຫ້ທົ່ວສັງຄົມຮັບຮູ້ ເພື່ອຈໍາກັດ, ຫຼຸດຜ່ອນອຸປະຕິເຫດທາງຫຼວງ ເພື່ອປົກປ້ອງຊີວິດ ແລະ ຊັບສິນຂອງປະຊາຊົນຂອງຊາດ ກໍ່ຄືການປົກປ້ອງສຸຂະພາບ ແລະ ສະຫວັດດີການສັງຄົມ. ຈາກນັ້ນໄດ້ພ້ອມກັນຢ່າງເປັນຂະບວນເລີ່ມຕົ້ນຈາກສະໂມສອນແຂວງຢາງເລາະຕາມເສັ້ນທາງໄປຕະຫຼາດວັງວິວຂຶ້ນດອຍຫ້ອງວ່າການແຂວງ ລົງໄປທາງດອຍຄັງເງິນເກົ່າອອກມາບ້ານໃຫຍ່ຫ້ວຍຊາຍເໝືອຄຸ້ມມຸງຄຸນສິນອອກໄປຕາມເສັ້ນທາງຫຼວງຄຸ້ມມີໄຊສະຫວ່າງອ້ອມກັບສະໂມສອນແຂວງຄືເກົ່າ ເຊິ່ງມີໄລຍະທາງຄວາມຍາວ 2,5 ກິໂລແມັດ.
ການຈັດງານໃນຄັ້ງນີ້ ເຊິ່ງມີຈຸດປະສົງສຳຄັນກໍ່ເພື່ອປຸກຈິດສຳນຶກໃຫ້ທົ່ວສັງ ຄົມໄດ້ຮັບຮູ້ເຖິ່ງຄວາມປອດໄພໂດຍເລີ່ມຕົ້ນຈາກເຮົາເອງ, ພ້ອມທັງປ່ຽນພຶດຕິກຳ: ເມົາບໍ່ຂັບ, ກາຍເປັນວັດທະນະທຳໃໝ່ໃນການໃຊລົດໃຊ້ຖະໝົນ, ເພື່ອຫຼຸດຜ່ອນອຸປະ ຕິເຫດ ເຮັດໃຫ້ທຸກຄົນໄດ້ຢູ່ຮ່ວມກັນຢ່າງໃຫ້ກຽດເຊິ່ງກັນ ແລະ ກັນໃນການໃຊ້ລົດໃຊ້ຖະໝົນຢ່າງລະມັດລະວັງ ເພື່ອຫຼຸດຜ່ອນຈາກການເກີດອຸປະຕິເຫດ.
ຂ່າວ: ບຸນຈັນ ມະນີໄຊ ວັນທີ 4 ເມສາ 2026.
ແອດມິນ: ທອງຈັນ ວົງປັນຍາ.
