ພິທີມອບ-ຮັບໜ້າທີ່ລະຫວ່າງ ຫົວໜ້າຫ້ອງການກະສິກຳ ແລະ ສິ່ງແວດລ້ອມ, ຫົວໜ້າຫ້ອງການແຮງງານ ແລະ ສະຫວັດດີການ-ສັງຄົມເມືອງຜູ້ເກົ່າ ກັບ ຜູ້ໃໝ່ ໄດ້ຈັດຂື້ນໃນວັນທີ 7 ມັງກອນ 2026 ນີ້, ຢູ່ທີ່ສະໂມສອນຂອງເມືອງ ໂດຍການເປັນປະທານຂອງທ່ານ ບຸນພັດ ສີສົມບັດ ຮອງເລຂາຄະນະບໍລິຫານງານພັກເມືອງ, ປະ ທານຄະນະກຳມະການປົກຄອງເມືອງ, ມີບັນດາຄະນະປະຈຳພັກ-ກຳມະການພັກເມືອງ, ມີຄະນະພະແນກກະສິກຳ ແລະ ສິ່ງແວດລ້ອມ, ພະແນກແຮງງານ ແລະ ສະຫວັດດີການ-ສັງຄົມແຂວງ, ຫົວໜ້າ-ຮອງຫົວໜ້າຫ້ອງການ, ພະນັກງານ-ລັດຖະກອນຫ້ອງການທີ່ກ່ຽວຂ້ອງເຂົ້າຮ່ວມ.
ພິທີໄດ້ຜ່ານບົດບັນທຶກການມອບ-ຮັບວຽກງານຂອງຫ້ອງການກະສິກຳ ແລະ ສິ່ງແວດລ້ອມ ແລະ ຫ້ອງການແຮງງານ ແລະ ສະຫວັດດີການ-ສັງຄົມ ເມືອງປາກທາ ເຊິ່ງປະກອບມີບັນດາເອກະສານຕ່າງໆ ແລະ ຊັບສິນຂອງລັດ ປະເພດເຄື່ອງຮັບໃຊ້ຫ້ອງການ, ໜ້າທີ່ ແລະ ວຽກງານອື່ນໆ ໃຫ້ຊຸດໃໝ່ໄດ້ສືບຕໍ່ຈັດຕັ້ງປະຕິບັດ,ຈາກນັ້ນ ກໍ່ໄດ້ຜ່ານບົດບັນທຶກມອບ-ຮັບໜ້າທີ່ ລະຫວ່າງ ທ່ານ ບຸນຕາ ແສງອຸ່ນແກ້ວ ຫົວໜ້າຫ້ອງການກະສິກຳ ແລະ ສິ່ງແວດລ້ອມ ຜູ້ເກົ່າ ມອບໃຫ້ ທ່ານ ອຳພອນ ອິນທະນົນ ຫົວໜ້າຫ້ອງການກະສິກຳ ແລະ ສິ່ງແວດລ້ອມ ຜູ້ໃໝ່, ພ້ອມທັງທ່ານ ຄຳເຄື່ອງ ພົມວິສັກ ຫົວໜ້າຫ້ອງການແຮງງານ ແລະ ສະຫວັດດີການ-ສັງຄົມເມືອງປາກທາ ຜູ້ເກົ່າ ມອບໃຫ້ ທ່ານ ບຸນຕາ ແສງອຸ່ນແກ້ວ ຫົວໜ້າຫ້ອງການແຮງງານ ແລະ ສະຫວັດດີການ-ສັງຄົມເມືອງປາກທາ ຜູ້ໃໝ່ ພ້ອມທັງເຊັນບົດບັນທຶກມອບ-ຮັບໜ້າທີ່ວຽກງານ ຢ່າງເປັນທາງການ.
ໂອກາດນີ້ທ່ານ ບຸນພັດ ສີສົມບັດ ປະທານພິທີໄດ້ມີຄຳເຫັນໂອ້ລົມ ພ້ອມທັງໄດ້ເນັ້ນໜັກບາງບັນຫາຕໍ່ພິທີທີ່ມີຄວາມໝາຍ ແລະ ຄວາມສຳຄັນ: ດັ່ງທີ່ຮູ້ນຳກັນແລ້ວວ່າການປັບປຸງລະບົບການຈັດຕັັ້ງແມ່ນວຽກງານປົກກະຕິຂອງວຽກງານການເມືອງ, ດັ່ງນັ້ນການສັບປ່ຽນໜ້ານທີ່ ແລະ ປ່ຽນບ່ອນປະຈຳການກໍ່ແມ່ນຄວາມຮຽກ ຮ້ອງຕ້ອງການ, ເພື່ອເຮັດແທດເໝາະກັບຄວາມຮັບຜິດຊອບຢ່າງຕັ້ງໜ້າ, ສະນັ້ນຜູ້ທີ່ໄດ້ຮັບໜ້າທີ່ໃໝ່ແມ່ນໃຫ້ສຶບຕໍ່ເອົາໃຈໃສ່ຝຶກຝົນຫຼໍ່ຫຼອມຕົນເອງຮອບດ້ານ, ບົນພື້ນຖານຍົກສູງສະຕິເຄົາລົບ ປະຕິບັດກົດໝາຍ, ລະບຽບວິໄນ ເປັນຄັນທຸງເຕົ້າໂຮມຄວາມສາມັກຄີ, ເປັນແບບຢ່າງນໍາໜ້າໃນການປະຢັດມັດທະຍັດ , ຕ້ານການຟຸມເຟືອຍ ແລະ ປະກົດການຫຍໍ້ທໍ້ຕ່າງໆ, ເອົາໃຈໃສ່ປັບປຸງແບບແຜນວິທີການເຮັດວຽກຂອງຕົນໃຫ້ສອດຄ່ອງ ແລະ ເໝາະສົມກັບ ສະພາບທີ່ຕົນສັງກັດຢູ່ ຫັນເອົາແຜນງານ, ໂຄງການ, ແຜນການຂອງຂັ້ນເທິງມາເປັນແຜນການຈັດຕັ້ງປະຕິບັດຢ່າງລະອຽດ, ຕ້ອງມີຈຸດສຸມ, ອັນໃດຄວນເຮັດກ່ອນ-ອັນໃດຄວນເຮັດຕາມຫຼັງ, ຈາກນັ້ນມີການ ສະຫຼຸບກວດກາຄືນ ພ້ອມທັງຖອດຖອນບົດຮຽນຢ່າງເປັນປົກກະຕິ, ເພີ່ມທະວີຍົກສູງຄວາມຮັບຜິດຊອບ ໃນການປະຕິບັດມະຕິ, ຄໍາສັ່ງຕ່າງໆ ຕະຫຼອດຮອດພາລະບົດບາດຂອງຫ້ອງການທີ່ກໍານົດໄວ້ ເປັນເສນາທິການໃຫ້ແກ່ຄະນະພັກຂັ້ນເທິງ, ເພີ່ມທະວີຍົກສູງຄຸນນະພາບທາງດ້ານຄວາມຮູ້ເຊັ່ນ: ຄວາມຮູ້ທາງດ້ານທິດສະດີ ແລະ ຄວາມຮູ້ທາງດ້ານວິຊາສະເພາະ ຂອງຂະແໜງການທີ່ຕົນເອງໄດ້ລົງເລິກໃນການຊີ້ນໍາ-ນໍາພາ, ໃຫ້ບັນດາສະຫາຍ ຄວນຕີຕົວຫ່າງເຫີນຈາກ ສິບພະຍາດທີ່ເປັນສັດຕູຕົວອັນຕະລາຍ ແລະ ເປັນສິ່ງກີດຂວາງຕໍ່ການພັດທະນາເປັນຕົ້ນແມ່ນ: ( ພະຍາດສໍ້ລາດບັງຫຼວງ, ພະຍາດຟູມເຟືອຍ, ພະຍາດອາດຍາສິດ,ພະຍາດຂີ້ຄ້ານມັກງ່າຍ ) ເພີ່ມທະວີຍົກສູງຄວາມສາມັກຄີພາຍໃນໃຫ້ແໜ້ນແຟ້ນ, ຊ່ວຍເຫຼືອເຊິ່ງກັນ ແລະ ກັນ, ເອົາໃຈໃສ່ປິ່ນອ້ອມຕໍ່ບັນດາໜ້າວຽກພາຍໃນຫ້ອງການ ໃຫ້ສໍາເລັດຕາມລະດັບຄາດໝາຍ.
ພາບ-ຂ່າວ: ວັນະເດດ.
ກວດແກ້: ບຸນເພັງ ທຸມມະວົງ.
ແອດມິນ: ທ ວົງປັນຍາ.
