ວັນທີ 16 ມີນາ 2026 ນິ້. ທ່ານ ປອ ສົມຄິດ ວົງປັນຍາ ຄະນະປະຈໍາພັກແຂວງ, ປະທານຄະນະກວດກາພັກ, ຫົວໜ້າອົງການກວດກາລັດ ແລະ ຫົວໜ້າອົງການຕ້ານສໍ້ລາດບັງຫຼວງ ແຂວງບໍ່ແກ້ວ, ພ້ອມດ້ວຍຄະນະໄດ້ລົງເຄື່ອນໄຫວ ເຮັດວຽກຢູ່ເມືອງປາກທາ ມີບັນດາທ່ານ ຄະນະບໍລິຫານງານພັກເມືອງ, ພາກສ່ວນກ່ຽວຂ້ອງເຂົ້າຮ່ວມ.
ທ່ານ ບຸນພັດ ສີສົມບັດ ຮອງເລຂາພັກເມືອງ ປະທານຄະນະກຳມະການປົກຄອງເມືອງປາກທາ ໄດ້ຜ່ານບົດລາຍງານຫຍໍ້ຂອງຄະນະບໍລິຫານງານພັກເມືອງ ໃນການເຄື່ອນໄຫວ, ການນໍາພາ-ຊີ້ນໍາວຽກງານຮອບດ້ານຂອງ ເມືອງໄລຍະຜ່ານມາ ຄະນະບໍລິຫານງານພັກເມືອງ ປາກທາ ສະໄໝທີ VIII ລວມມີ 23 ສະຫາຍ, ຍິງ 3 ສະຫາຍ, ມີຄະນະປະຈໍາພັກ 7 ສະຫາຍ, ຍິງ 2 ສະຫາຍ, ບັນດາສະຫາຍຄະນະບໍລິຫານງານພັກເມືອງຊຸດນີ້ ນອກຈາກສະຫາຍເລຂາ, ຮອງເລຂາແລ້ວ ຍັງໄດ້ຊັບຊ້ອນແບ່ງຄວາມຮັບຜິດຊອບນໍາພາ-ຊີ້ນໍາໃນແຕ່ລະຂົງເຂດຄື: ຂົງເຂດປ້ອງກັນຊາດ-ປ້ອງກັນຄວາມສະຫງົບ 1 ສະຫາຍ, ຂົງເຂດເສດຖະກິດ 4 ສະຫາຍ, ຂົງເຂດພັກ-ພະນັກງານ 2 ສະຫາຍ, ຂົງເຂດວັດຖະນາທໍາ-ສັງຄົມ 7 ສະຫາຍ, ຍິງ 1 ສະຫາຍ, ຂົງເຂດອົງການຈັດຕັ້ງມະຫາຊົນ 2 ສະຫາຍ ຍິງ 1 ສະຫາຍ, ຫ້ອງວ່າການ 1 ສະຫາຍ, ຊີ້ນໍາກຸ່ມບ້ານໃຫ່ຍຫາດສະ 1 ສະຫາຍ, ຊີ້ນຳກຸ່ມບ້ານໃຫ່ຍກ້ອນຕື່ນ 1ສະຫາຍ, ໃນຈໍານວນດັ່ງກ່າວ, ຍົກຍ້າຍບ່ອນປະຈໍາການ 1 ສະຫາຍ, ປັດຈຸບັນຄະນະບໍລິຫານງານພັກເມືອງປາກທາມີ 22 ສະຫາຍ, ຍິງ 3 ຜ່ານການ ນຳພາ-ຊີ້ນຳຮອບດ້ານ ຂອງຄະນະບໍລິຫານງານພັກເມືອງ ປາກທາ ຕະຫຼອດໄລຍະ ຜ່ານມາ ຄະນະພັກພວກເຮົາໄດ້ຍົກສູງຄວາມຮັບຜິດຊອບປະຕິບັດພາລະບົດບາດ, ສິດ, ໜ້າທີ່ຂອງຕົນສຸມສະຕິປັນຍາ ເຂົ້າໃນການຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ VIII ເຂົ້າໃນແຜນງານ, ໂຄງການ, ກິດຈະການຕ່າງໆ ເຂົ້າສູ່ແຕ່ລະຂົງເຂດວຽກງານ ການນໍາພາວຽກງານພັດທະນາເສດຖະກິດ ໄດ້ຢຶດໝັ້ນ ແລະ ຖືການພັດທະນາເສດຖະກິດເປັນປາຍແຫຼມ ຕາມທິດພັດທະນາແບບຍືນຍົງ, ສົ່ງເສີມທຸກພາກສ່ວນເສດຖະກິດທັງພາຍໃນ ແລະ ຕ່າງປະເທດ ເຂົ້າມາພັດທະນາພື້ນຖານໂຄງລ່າງເສດຖະກິດ-ສັງຄົມຂອງເມືອງ ນັບມື້ນັບຫຼາຍຂື້ນ, ຊຸກຍູ້ການສະໜອງແຫຼ່ງທຶນສິນເຊື່ອເພື່ອຍູ້ແຮງການຜະລິດສະບຽງອາຫານ ແລະ ຜະລິດເປັນສິນຄ້າ, ລວມຍອດຜະລິດຕະພັນພາຍໃນ GDP ປະຕິບັດໄດ້ 231,29 ຕື້ ກີບ, ເສດຖະກິດຂະຫຍາຍຕົວໃນລະ ດັບ 3,17% ໃນນີ້: ດ້ານກະສິກໍາປ່າໄມ້ 156,49 ຕື້ ກີບ, ຂະຫຍາຍຕົວ 3,3%, ກວມ 67,66%, ດ້ານອຸດສາຫະກໍາ 22,54 ຕື້ກີບ, ຂະຫຍາຍຕົວ 3%, ກວມ 9,75%, ດ້ານການບໍລິການ 52,25 ຕື້ກີບ, ຂະຫຍາຍຕົວ 2,9% ກວມ 22,59 %, (ສະເລ່ຍລາຍຮັບຕໍ່ຫົວຄົນ 9,920,550 ກີບ/ຄົນ) ແລະ ຍັງມີຂົງເຂດວຽກງານອື່ນໆກໍ່ໄດ້ຮັບການຈັດຕັ້ງປະຕິບັດທີ່ໄດ້ຮັບຜົນສຳເລັດເຊັ່ນດຽວກັນ.
ຈາກນັ້ນ ຜູ້ເຂົ້າຮ່ວມກອງປະຊຸມກໍ່ໄດ້ມີຄຳເຫັນແລກປ່ຽນບົດຮຽນເຊິ່ງກັນ ແລະ ກັນ ໃນການຈັດຕັ້ວປະຕິບັດວຽກງານໃນໄລຍະຜ່ານມາ ໂດຍຍົກໃຫ້ເຫັນດ້ານດີຜົນງານ, ດ້ານອ່ອນ ຂໍ້ຄົງຄ້າງ, ສາເຫດບາງບົດຮຽນທີ່ຖອດຖອນໄດ້ ແລະ ພ້ອມກັນວາງທິດທາງແຜນການ, ວິທີແກ້ໄຂໃນຕໍ່ໜ້າຢ່າງເປັນແຜນງານອັນລະອຽດໃນການຈັດຕັ້ງປະຕິບັດໃນຕໍ່ໜ້າໃຫ້ດີຂື້ນເທື່ອລະກ້າວ.
ໂອກາດນິ້. ທ່ານ ປອ ສົມຄິດ ວົງປັນຍາ ຄະນະປະຈໍາພັກແຂວງ ປະທານຄະນະກວດກາພັກ-ລັດແຂວງບໍ່ແກ້ວ, ໄດ້ມີຄໍາເຫັນເໜັ້ນໜັກບາງບັນຫາໃຫ້ ຄະນະບໍລິຫານງານພັກເມືອງປາກທາ ຈົ່ງຍົກສູງພາລະບົດບາດການຊີ້ນໍາ-ນໍາພາຕໍ່ໜ້າທີ່ການເມືອງດ້ວຍຄວາມຮັບຜິດຊອບສູງໃນການຜັນຂະຫຍາຍມະຕິ, ຄຳສັ່ງ ແລະ ເອກະສານສຳຄັນຕ່າງໆ ໃຫ້ແກ່ຖັນແຖວພະນັກງານ, ທະຫານ-ຕໍາຫຼວດ ຕະຫຼອດຮອດປະຊາຊົນບັນດາເຜົ່າ ໃຫ້ມີແນວຄິດອຸ່ນອ່ຽງທຸ່ນທ່ຽງ ແລະ ສຶບຕໍ່ຕິດຕາມກວດກາພັກ, ກວດກາລັດ ແລະ ຜົນຂອງການກວດກາ, ຍົກສູງບົດບາດການນໍາພາຂອງພັກ ໃຫ້ມີຄວາມເຂັ້ມແຂງ ໜັກແໜັ້ນ.
ພາບ-ຂ່າວ: ວັນະເດດ
ແອດມິນ: ທອງຈັນ ວົງປັນຍາ
