ເພື່ອເປັນການຕ້ານ ແລະ ສະກັດກັ້ນການແຜ່ລະບາດຂອງພະຍາດຕິດຕໍ່ທາງເພດສຳພັນ ເຊື້ອ HIV ແລະ ເອດ ບໍ່ໃຫ້ແຜ່ກະຈາຍອອກສູ່ວົງກວ້າງນັ້ນ. ໃນວັນທີ 16 ມີນາ 2026 ນີ້ ທີ່ຫ້ອງການ ສາທາລະນະສຸກ ເມືອງຕົ້ນເຜິ້ງ ໄດ້ຈັດກອງປະຊຸມ ເຜີຍແຜ່ກົດໝາຍ ວ່າດ້ວຍການ ແລະ ຄວບຄຸມເຊື້ອ ເຮສໄອວີ/ພະຍາດເອດ ສະປັບປຸງ ຂຶ້ນຢ່າງເປັນທາງການ. ພາຍໃຕ້ການການເຂົ້າຮ່ວມເປັນປະທານຂອງ ທ່ານ ດຣ ຄຳຄູນ ແສງສະຫວ່າງ ຮອງຫົວໜ້າພະແນກສາທາລະນະສຸກ ແຂວງບໍ່ແກ້ວ, ມີທ່ານ ຄໍາຫຼ້າ ຈັນທະວົງ ຄະນະປະຈໍາພັກເມືອງ ຮອງປະທານປົກຄອງເມືອງ, ມີຄະນະທີມງານຂອງແຂວງ, ຄະນະກໍາມະການຄວບຄຸມພະຍາດຕິດຕໍ່ຂັ້ນເມືອງ ແລະ ແຂກຖືກເຊີນຈາກຫ້ອງການທີ່ກ່ຽວຂ້ອງອ້ອມຂ້າງເມືອງ ເຂົ້າຮ່ວມ.
ກອງປະຊຸມ ທ່ານ ນາງ ພູທອນ ແສງສຸລິຍາ ຮອງຂະແໜງຄວບຄຸມພະຍາດຕິດຕໍ່ ພະແນກສາທາລະນະສຸກແຂວງ ໄດ້ນໍາສະ ເໜີເຖິງສະຖານະການແຜ່ລະບາດຂອງເຊື້ອເຮສໄອວີ/ພະຍາດເອດ ໃນ ສປປ ລາວ, ທົ່ວແຂວງ ບໍ່ແກ້ວ ແລະ ເມືອງ ຕົ້ນເຜິ້ງ. ເຊິ່ງໄດ້ເວົ້າເຖິງສະພາບລວມກ່ຽວກັບ HIV ໃນ ສປປ ລາວ, ຈຳນວນຕິດເຊື້ອ, ເປັນພະຍາດເອດ ແລະ ເສຍຊີວິດຍ້ອນພະຍາດເອດ ແຕ່ປີ 1994 – 2025 ໃນ ສປປ ລາວ, ສະພາບລວມກ່ຽວກັບການຕິດເຊື້ອໃນແຂວງ ບໍ່ແກ້ວ ແລະ ເມືອງຕົ້ນເຜິ້ງ ແຕ່ປີ 2003- 2025 ພົບຜູ້ຕິດເຊື້ອ ທີ່ມາຈາກທັງພາຍໃນ ແລະ ຕ່າງປະເທດ ສ່ວນຫຼາຍແມ່ນອາຍຸ 15 ປີເຖິງ 49 ປີ ມາຈາກ ອາຊີບຊາວນາ, ຄ້າຂາຍ/ນັກທຸລະກິດ ແລະ ກໍາມະກອນເຄື່ອນຍ້າຍ. ມາຮອດປັດຈຸບັນຕົວເລກຜູ້ຕິດເຊື້ອພາຍໃນແຂວງ ມີທັງໝົດ 552 ຄົນ, ໄດ້ຮັບການກິນຢາ 540 ຄົນ, ແຕ່ໃນນີ້ເປັນພຽງສ່ວນໜຶ່ງຂອງຈໍານວນຜູ້ທີ່ເຂົ້າມາກວດຫາເຊື້ອ ແລະ ໄດ້ຮັບການປິ່ນປົວເທົ່ານັ້ນ ແລະ ຍັງມີຄົນອີກຈໍານວນຫຼາຍທີ່ບໍ່ຮູ້ວ່າຕົວເອງຕິດເຊື້ອ, ບໍ່ຍອມຮັບການປິ່ນປົວ, ບໍ່ຍອມຮັບການຮັກສາ. ຈາກນັ້ນໄດ້ຮັບຟັງກົດໝາຍວ່າດ້ວຍການກັນ ແລະ ຄວບຄຸມເຊື້ອ HIV, ພະຍາດເອດ ( ສະບັບປັບປຸງ ) ປີ 2025 ເຊິ່ງມີທັງໝົດ XI ພາກ, 69 ມາດຕາ. ກົດໝາຍສະບັບນີ້ ກໍານົດ ຫຼັກການ, ລະບຽບການ ແລະ ມາດຕະການ ກ່ຽວກັບການຄຸ້ມຄອງ, ຕິດຕາມ ກວດກາ ວຽກງານກັນ ແລະ ຄວບຄຸມ ເຊື່ອເຮສໄອວີ/ພະຍາດເອດ ເພື່ອໃຫ້ວຽກງານດັ່ງກ່າວ ດໍາເນີນຢ່າງເປັນປົກກະຕິ, ມີປະສິດທິພາບ, ປະສິດທິຜົນ ແນໃສ່ຫຼຸດຜ່ອນການຕິດເຊື້ອເຮສໄອວີ, ການແຜ່ລະບາດຂອງເຊື້ອເຮສໄອວີ/ພະຍາດເອດ, ການເສຍຊີວິດຂອງຜູ້ຕິດເຊື້ອເຮສໄອວີ ແລະຜູ້ເປັນພະຍາດເອດ, ຜົນກະທົບຕໍ່ເສດຖະກິດ-ສັງຄົມຂອງຊາດ, ຮັບປະກັນໃຫ້ພົນລະເມືອງ ມີສຸຂະພາບແຂງແຮງ, ສາມາດເຊື່ອມໂຍງກັບພາກພື້ນ, ສາກົນ ປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ.
ຕໍ່ກັບສະພາບການດັ່ງກ່າວ ປະທານກອງປະຊຸມໄດ້ຮຽກຮ້ອງໃຫ້ທຸກຄົນໃນສັງຄົມ, ຈົ່ງຮ່ວມແຮງຮ່ວມໃຈກັນ ໃຫ້ມີສ່ວນຮ່ວມໃນການຕ້ານ ແລະ ສະກັດກັ້ນໃນການແຜ່ລະບາດຂອງເຊື້ອພະຍາດ HIV ພະຍາດເອດ. ໂດຍການສວມໃສ່ຖົງຢາງອານາໄມທຸກຄັ້ງເມື່ອມີເພດສໍາພັນທີ່ບໍ່ແມ່ນຄູ່ນອນຂອງຕົນເອງ, ກວດສຸຂະພາບຂອງຕົນເອງເປັນປະຈໍາ, ກໍລະນີພົບເຊື້ອແມ່ນໃຫ້ຮີບຮ້ອນເຂົ້າຮັບການປິ່ນປົວເພື່ອຫຼຸດດຜ່ອນບັນຫາການແຜ່ລະບາດຂອງພະຍາດເອດພາຍໃນເມືອງ ກໍ່ຄືພາຍໃນແຂວງ ໃຫ້ຫຼຸດໜ້ອຍຖອຍລົງເທື່ອລະກ້າວ.
ພາບ-ຂ່າວ: ນ. ຈອມແສງ ແສນປະເສີດ.
ກວດ-ແກ້: ສ. ປັນຍາທອງ, ຄະນະໂຄສະນາອົບຮົມເມືອງຕົ້ນເຜິ້ງ.
ແອດມິນ: ທອງຈັນ ວົງປັນຍາ.
