ເນື່ອງໃນໂອກາດວັນຊາດທີ 2 ທັນວາ ທີ່ໄດ້ຫມູນຫວຽນມາ ຄົບຮອບ 49 ປີ ແລະ ວັນຄ້າຍ ວັນເກີດ ປະທານ ໄກສອນ ພົມວິຫານ ຄົບຮອບ 104 ປີ; ໃນເວລາ 6 ໂມງ 30 ນາທີ ຕອນເຊົ້າຂອງວັນທີ 2 ທັນວາ 2024 ນິ້. ການນໍາພັກ-ລັດ ແຂວງບໍ່ແກ້ວ; ມີບັນດາຄະນະປະຈໍາພັກແຂວງ, ກໍາມະການພັກແຂວງ ແລະ ຫົວຫນ້າ ພະແນກການອ້ອມຂ້າງແຂວງ ນໍາໂດຍ ທ່ານ ປອ ທອງຈັນ ມະນີໄຊ ກໍາມະການສູນກາງພັກ ເລຂາພັກແຂວງເຈົ້າແຂວງບໍ່ແກ້ວ. ພ້ອມຄະນະນໍາຂອງແຂວງ ໄດ້ເຂົ້າວາງພວງມາລາ ຢູ່ທີ່ອານຸສອນນັກຮົບນິລະນາມທີ່ (ຄ້າຍປ່າໄລ່ ) ເພື່ອເປັນການສະແດງຄວາມເຄົາລົບຮັກ, ຄວາມກະຕັນຍູ ຮູ້ບຸນຄຸນ ເຖິງຄຸນງາມຄວາມດີ, ນໍ້າໃຈຕໍ່ສູ້ຢ່າງພິລະອາດຫານ ແລະ ບໍ່ຍອມຈໍານົນຂອງບັນພະບູລຸດລາວ ກໍຄືບັນດາສະມາຊິກພັກນັກຮົບປະຕິວັດທີ່ໄດ້ເສຍສະຫຼະເລືອດເນື້ອ-ຊີວິດ, ເພື່ອພາລະກິດປະຕິວັດຢ່າງອົງອາດກ້າຫານ ພາຍໃຕ້ການຊີ້ນໍາ-ນໍາພາຂອງພັກປະຊາຊົນປະຕິວັດລາວ ຈົນສາມາດຍາດໄດ້ໄຊຊະນະອັນໃຫຍ່ຫຼວງ ແລະ ປະກາດເອກະລາດຂື້ນຢ່າງສະຫ່ງາຜ່າເຜີຍ ໃນວັນທີ 2 ທັນວາ 1975, ພາຍຫຼັງສໍາເລັດການວາງພວງມາລາທີ່ອານຸສາວະລີນັກຮົບນິລະນາມແລ້ວ. ໄດ້ສືບຕໍ່ວາງກະຕ່າດອກໄມ້ ຢູ່ຕໍ່ໜ້າຮູບປັ້ນຫຼໍ ປະທານໄກສອນ ພົມວິຫານ ອາດິດຜູ້ນໍາທີ່ແສນເຄົາລົບຮັກຂອງທົ່ວປວງຊົນລາວທັງຊາດ ເພື່ອສະແດງເຖີງຄວາມກະຕັນຍູຮູ້ບຸນຄຸນຂອງທ່ານ ທີ່ໄດ້ສຸມສະຕິປັນຍາເຂົ້າໃນການນໍາພາຂະບວນການຕໍ່ສູ້ຕ້ານການຮຸກຮານຂອງພວກຈັກກະພັດຕ່າງດ້າວ ຈົນສາມາດຍາດໄດ້ໄຊຊະນະ ແລະ ນໍາເອົາຄວາມຢູ່ເຢັນເປັນສຸກມາສູ່ປະຊາຊົນລາວບັນດາເຜົ່າ. ເຊິ່ງຜົນງານ ແລະ ຄຸນງານຄວາມດີຂອງທ່ານ ແມ່ນໄດ້ຈາລືກໃນຄວາມຊົງຈໍາຂອງປະຊາຊົນລາບັນດາເຜົ່າຕະຫລອດໄປ.
ຫຼັງຈາກສໍາເລັດພິທີວາງພວງມາລາ ແລະ ກະຕ່າດອກໄມ້ແລ້ວ ຍັງສືບຕໍ່ຈັດຕັ້ງປາຖະກະຖາ ຫວນຄືນມູນເຊື້ອດັ່ງກ່າວ ຢູ່ທີ່ຫໍພິພິທະພັນແຂວງ ເນື້ອໃນປາຖະກະຖາປະກອບດ້ວຍ 3 ເນື້ອໃນຄື: ວັນຊາດ ທີ 2 ທັນວາ ຄົບຮອບ 49 ປີ, ວັນຄ້າຍ ວັນເກີດປະທານໄກສອນ ພົມວິຫານ ຄົບຮອບ 104 ປີ ແລະ ວັນຕ້ານການສໍ້ລາດບັງຫຼວງ ໃນພິທີດັ່ງກ່າວ ໃຫ້ກຽດຂຶ້ນເລົ່າມູນເຊື້ອວັນຊາດ ທີ 2 ທັນວາ ໂດຍແມ່ນທ່ານ ປອ ທອງຈັນ ມະນີໄຊ ກໍາມະການສູນກາງພັກ ເລຂາພັກແຂວງເຈົ້າແຂວງບໍ່ແກ້ວ; ໃຫ້ກຽດເລົ່າມູນເຊື້ອອັນດີງານ ຂອງປະທານ ໄກສອນ ພົມວິຫານ ໂດຍແມ່ນທ່ານ ເພັງສອນ ແກ້ວວິໄລ ຮອງເລຂາພັກແຂວງ ແລະ ຫວນຄືນວັນຕ້ານການສໍ້ລາດບັງຫຼວງ ໂດຍແມ່ນທ່ານ ສຸກຂະ ຫຼຽນທອງຄໍາ ຄະນະປະຈໍາພັກແຂວງ ປະທານກວດກາພັກ-ລັດແຂວງ ໃນພິທີດັ່ງກ່າວນີ້ ມີຜູ້ເຂົ້າຮ່ວມ ຮັບຟັງທັງໝົດ ຈໍານວນ 472 ຄົນ ຍິງ 128 ຄົນ. ໃນຕອນທ້າຍຂອງພິທີ ໄດ້ມີການອອຍພອນ ຄະນະປະທານພິທີຈາກ ສະມາຄົມ ຫວຽດນາມ ປະຈໍາຢູ່ແຂວງບໍ່ແກ້ວ.
ກ້ວ.