ໃນ ຕອນເຊົ້າເວລາ 8:00 ໂມງ ຂອງວັນທີ 18 ກໍລະກົດ 2025 ຢູ່ທີ່ສະໂມສອນ ແຂວງບໍ່ແກ້ວ ໄດ້ຈັດກອງປະຊຸມທາບທາມບຸກຄະລະກອນ ເຂົ້າໂຄງປະກອບ ຄະນະບໍລິຫານງານພັກແຂວງ ສະໄໝທີ VII ຮອບທີ I ໂດຍການເປັນປະທານຂອງ ທ່ານ ປອ. ທອງຈັນ ມະນີໄຊ ກຳມະການສູນກາງພັກ ເລຂາພັກແຂວງ ເຈົ້າແຂວງ ແຂວງ ບໍ່ແກ້ວ; ມີຄະນະປະຈຳພັກແຂວງ, ກຳມະການພັກແຂວງ, ຄະນະບໍລິຫານງານພັກເມືອງ ເມືອງ ຫ້ວຍຊາຍ, ມີຫົວໜ້າ-ຮອງຫົວໜ້າ ບັນດາພະແນກການອ້ອມຂ້າງແຂວງ, ຫົວໜ້າຂະແໜງ, ຄະນະພັກເຂດ, ບ້ານ, ມີພະນັກງານອາວຸໂສບຳນານ ເຂົ້າຮ່ວມ ລວມຜູ້ເຂົ້າຮ່ວມທັງໝົດ 500 ກວ່າຄົນ.
ໃນ ກອງປະຊຸມ ປະທານໄດ້ກ່າວເປີດກອງປະຊຸມຢ່າງເປັນທາງການ ແລະ ທ່ານ ສຸກຂະ ຫຼຽນທອງຄຳ ຄະນະປະຈຳພັກແຂວງ ປະທານກວດກາພັກ-ຫົວໜ້າອົງການກວດກາລັດໄດ້ຂື້ນຜ່ານມາດຖານເງື່ອນໄຂ ຜູ້ທີ່ມີສິດລົງສະໝັກເປັນ ຄະນະບໍລິຫານງານພັກແຂວງ ຊຸດໃໝ່; ຈາກນັ້ນຄະນະຮັບຜິດຊອບໄດ້ແຈກຍາຍຮ່າງທາບທາມ ປະກອບມີ: ບັດທາບທາມຄວາມໄວ້ວາງໃຈ; ບັດທາບທາມຄະນະບໍລິຫານງານຊຸດໃໝ່ ແລະ ຊີວະປະຫວັດຂອງພະນັກງານຂັ້ນນຳພາຄຸ້ມຄອງ; ນອກນັ້ນ ປະທານກອງປະຊຸມຍັງໄດ້ ຊີ້ນຳການທາບທາມ. ເປັນຕົ້ນແມ່ນການຄັດເລືອກເອົາບຸກຄະລາກອນເຂົ້າໂຄງປະກອບຕ້ອງໃຫ້ມີ: ຄຸນທາດການເມືອງ-ຄຸນສົມບັດສິນທຳປະຕິວັດ, ຄວາມຮູ້ຄວາມສາມາດ, ຄວາມເປັນແບບຢ່າງນຳພາທີ່ດີ; ມີຄວາມບຸກບືນຜ່ານຜ່າ, ມີມະນະຈິດປະຕິວັດ, ມີແບບແຜນວິທີເຮັດວຽກທີ່ດີ, ມີແບບແຜນດຳລົງຊີວິດປອດໃສຂາວສະອາດ ແລະ ມີຄວາມພ້ອມແບກຫາບ ພາລະກິດອັນໃຫຍ່ຫຼວງຂອງຊາດ.
ກອງ ປະຊຸມດຳເນີນມາຮອດເວລາ 11:30 ໂມງ ຈຶ່ງໄດ້ປິດລົງຢ່າງເປັນທາງການ ພາຍໃຕ້ບັນຍາກາດທີ່ເຕັມໄປດ້ວຍຄວາມໝາຍ, ຄວາມສຳຄັນ ແລະ ຜົນສຳເລັດອັນຈົບງາມ.
ທ່ານ. ປອ. ທອງຈັນ ມະນີໄຊ ເລຂາພັກແຂວງ ແຂວງບໍ່ແກ້ວ
ທ່ານ. ສຸກຂະ ຫຼຽນທອງຄຳ ຄະນະປະຈຳພັກແຂວງ
- ແອດມິນ: ທອງຈັນ ວົງປັນຍາ.
ອຸດົມພອນ ສີລິພວງ.
- ກວດແກ້: ກົງເພດ ຈັນສະຫວ່າງ.
