ໃນວັນທີ 21 ສິງຫາ 2026 ຜ່ານມານີ້ ເມືອງເມິງ ແຂວງບໍ່ແກ້ວ ໄດ້ສ້າງຂະບວນການອອກແຮງງານລວມ ອານາໄມ ຕັດຫຍ້າ, ຖົມບວກ ແລະ ຂຸດຮອງລະບາຍນໍ້າຕາມເສັ້ນທາງ ລະຫວ່າງເທດສະບານເມືອງຫາບ້ານໂພນສະຫວ່າງ ແລະ ເທດສະບານເມືອງຫາບ້ານຫົວນໍ້າຄາ ເຊິ່ງນໍາໂດຍ ທ່ານ ສີວິໄລ ສີແສນດີ ກໍາມະການພັກແຂວງ ເລຂາພັກເມືອງ ມີຄະນະພັກທີ່ຮັບຜິດຊອບແຕ່ລະບ້ານ, ມີຄະນະກໍາມະການປົກຄອງຕາແສງນໍ້າເມິງ, ພະນັກງານອ້ອມຂ້າງເມືອງ, ສອງກອງກໍາລັງ ປກຊ-ປກສ, ອົງການປົກຄອງບ້ານ ແລະ ປະຊາຊົນບັນດາເຜົ່າພາຍໃນ 7 ບ້ານເຂົ້າຮ່ວມຢ່າງພ້ອມພຽງ.
ໂດຍປະຕິບັດຕາມແຈ້ງການຂອງຫ້ອງວ່າການເມືອງເມິງ ສະບັບເລກທີ 274/ຫວມ.ມມ ການສ້າງຂະບວນການໃນຄັ້ງນີ້ໄດ້ແບ່ງອອກເປັນ 6 ຈຸດຄື: ຈຸດທີ1 ແຕ່ເທດສະບານເມືອງຫາບ້ານໂພນສະຫວ່າງ, ຈຸດທີ 2 ແຕ່ເທດສະບານເມືອງຫາບ້ານຫ້ວຍທາດໃໝ່, ຈຸດທີ 3 ບ້ານຫ້ວຍທາດເກົ່າ, ຈຸດທີ 4 ບ້ານໂພນຈະເລີນ, ຈຸດທີ 5 ບ້ານປຸງຜາ ແລະ ຈຸດທີ 6 ບ້ານຫົວນໍ້າ ເຊິ່ງໃນແຕ່ລະຈຸດແມ່ນຈັດແບ່ງຄະນະພັກ, ກໍ່ຄືບັນດາຫ້ອງການທີ່ຮັບຜິດຊອບແຕ່ລະບ້ານ ລົງຊີ້ນໍາ-ນໍາພາ ພະນັກງານ, ອົງການການປົກຄອງບ້ານ ແລະ ປະຊາຊົນ ໄດ້ສົມທົບກັບ 3 ບໍລິສັດຄື: ບໍລິສັດຢຸຍເສີນກໍ່ສ້າງຂົວ-ທາງ ແລະ ເຄຫາສະຖານ ຈໍາກັດ, ບໍລິສັດພອນວິໄລກໍ່ສ້າງຂົວ-ທາງ ຈໍາກັດ ແລະ ບໍລິສັດ ຕໍ່ລູລ່າຫູ່ລາວກໍ່ສ້າງຂົວ-ທາງ ແລະ ເຄຫາສະຖານ ຈໍາກັດ ອອກແຮງງານລວມອານາໄມຕັດຫຍ້າ, ຖົມບວກ ແລະ ຂຸດຮອງລະບາຍນໍ້າຕາມເສັ້ນທາງ ໂດຍນໍາເອົາອຸປະກອນເປັນຕົ້ນແມ່ນ: ຈົກ, ຊ້ວນ, ລົດດາມ, ລົດໄທໃຫຍ່ ແລະ ລົດຈົກ ຫານະດັ່ງກ່າວແມ່ນໄດ້ຮັບການສະໜັບສະໜູນຈາກ 3 ບໍລິສັດ ນອກຈາກນັ້ນບັນດາຫ້ອງການອ້ອມຂ້າງເມືອງກໍ່ໄດ້ອານາໄມຕັດຫຍ້າຕາມສໍານັກງານຫ້ອງການຂອງຕົນຕື່ມອີ່ກ.
ຄະນະຮັບຜິດຊອບໃນການສ້າງຂະບວນການຂອງເມືອງຍັງໃຫ້ຮູ້ວ່າ: ການສ້າງຂະບວນການໃນຄັ້ງນີ້ ກໍ່ເພຶ່ອຄໍານັບຮັບຕ້ອນວັນສໍາຄັນຕ່າງໆຂອງພັກຂອງຊາດ ທັງເປັນການປູກຈິດສໍານຶກໃຫ້ໝົດທຸກຄົນຈົ່ງຊ່ວຍກັນປົກປັກຮັກສາເສັ້ນທາງ ຮັບປະກັນເຖິງຄວາມປອດໄພໃນການເດີນທາງໄປມາໃຫ້ມີຄວາມສະດວກສະບາຍ ແລະ ວອງໄວຂຶ້ນກ່ວາເກົ່າ ທັງເປັນການທຳລາຍບ່ອນເພາະພັນຂອງຍຸງລາຍ ແລະ ຕ້ານການລະບາດຂອງພະຍາດຕາມລະດູການ ໃນໂອກາດດ່ຽວກັນນີ້ ທ່ານ ສີວິໄລ ສີແສນດີ ຕ່າງໜ້າການນໍາຂອງເມືອງ ໄດ້ນໍາເອົາໂທລະໂຄງຈໍານວນ 2 ໜ່ວຍໄປມອບໃຫ້ແກ່ອົງການປົກຄອງບ້ານຫ້ວຍທາດໃໝ່ ຕື່ມອີ່ກ.
ຂ່າວ: ອຸ່ນຄໍາ ຂັນວາລິດ.